د طالبانو د صنایعو او سوداګرۍ وزارت اعلان وکړ، چې د افغان سوداګرو د ټرانزیټي توکو د لېږد بهیر چې د کراچۍ په بندر کې بند پاتې و، بېرته پیل شوی دی.
دغه وزارت وايي، چې د پاکستان د نوې ټرانزیټي تګلارې له امله د تلې له ۱۱ مې تر عقرب ۲۵ مې پورې د کراچۍ په بندر کې د افغان سوداګرو د ټرانزیټي توکو ۳ زره کانټینرونه درول شوي وو.
د طالبانو د سوداګرۍ وزارت نن سې شنبه (د لیندۍ ۷ مه) په یوه خبرپاڼه کې لیکلي، چې د دغه وزارت سرپرست نورالدین عزیزي د افغانستان، پاکستان او ازبکستان په درې اړخیزو خبرو کې د افغان سوداګرو د ټرانزیټي مالونو د خلاصون په اړه خبرې کړې وې.
د طالبانو په وینا؛ د دې ډلې او پاکستان ترمنځ د شوې هوکړې له مخې د کراچۍ له بندر څخه د افغان سوداګرو د ټرانزیټي مالونو درې زره کانټینرونه خوشې شوي دي.
د پاکستان موقت حکومت د تلې په ١٥مه اعلان وکړ، چې افغان سوداګر د کراچۍ له بندر څخه د خپلو ټرانزيټي توکو له لېږدولو مخکې بايد د هغو توکو د بيو په اندازه بانکي ضمانت ورکړي، چې یو شمېر یې احتمالي قاچاق کېږي.
په دغو توکو کې شریني باب، بوټان، جامې، میخانیکي او بریښنایي ماشینونه، کمپلې او د کور توکي شامل دي.
پاکستاني چارواکي ادعا کوي، چې د کراچۍ بندر له لارې د افغان سوداګرو ټرانزیټي توکي یا په پاکستان کې پلورل کېږي او یا له افغانستانه بېرته د پاکستان بازار ته قاچاق کېږي.
پاکستان دغه مساله د دغه هېواد اقتصادي زیان ګڼي.