واشنګټن وايي د امریکا وګړي افغانان د خپلو کورنیو را بللو لپاره غوښتنه کولی شي

د امریکا بهرنیو چارو وزارت وايي، هغه افغانان چې د دغه هېواد وګړتوب لري، له افغانستانه خپلې کورنۍ او لا یې هم غړي متحده ایالتونو ته را بللی شي. دا وزارت خپله اعلامیه کې وايي، له کورنۍ سره د بیا یو ځای کېدو ویزه د بشرپالو دلایلو له مخې د افغان توکمه امریکايي وګړو غړو ته ور کوي.

په اعلامیه کې راغلي: د امریکا حکومت له امریکايي وګړو او متحده ایالتونو کې افغانانو سره مرستې ته ژمن دی چې په افغانستان کې د پاتې کورنیو غړو سره یو ځای شي.

د وزارت په وېبپاڼه کې د دا ډول کسانو لپاره په پښتو او دري لارښوونې هم پرلیکه شوې دي.

په دغه اعلامیه کې راغلي که امریکايي وګړی یاست، ښايي مېرمن، بچیان او مور پلار دې امریکا ته د راتلو شرایط پوره کړي.

د دې اعلامیې له مخې، امریکايي وګړي د خپلې خور، ورور او بالغو مجردو بچیانو لپاره هم د ویزې غوښتنه کولی شی.

د ۲۰۲۱ کال په اګسټ کې د افغان جمهوریت په پرځېدو پسې امریکا د همغې میاشتې تر پایه له کابل هوايي ډګر په زرګونو افغانان ولېږدول.

په تېرو دوو کلونو کې هم له امریکايي ادارو سره د کاري مخینې افغانان پاکستان ته کډه شوي او دغه هېواد ته د تلو په تمه دي.

په پاکستان کې د افغان کډوالو د اېستلو لړۍ پیلېدو سره دغه د امریکا کېس لرونکي افغانان هم له ستونزو سره مخ دي.