د امریکا د ملي امنیت پخواني سلاکار جان بولټن په کانګرس غږ کړی، چې "ژر تر ژره" د اوکراین لپاره اضافي مرستې تصویب کړي.
نوموړي خبرداری ورکړ، چې که چېرې امریکا اقدام ونه کړي روسیه به له اوکراین څخه جګړه وګټي.
د کانګرس ډېری جمهوري غوښتونکي غړي د اوکراین سره د اضافي مرستو مخالف دي.
دوی وايي؛ په داسې حال کې چې د بایډن حکومت د کډوالو پرمخ د امریکا د پولو د تړلو په برخه کې اقدام نه کوي، دوی ولې باید اوکراین سره اضافي مرستې تصویب کړي؟
بولټن د یکشنبې په ورځ یو امریکايي راډیویي پروګرام کې وویل: "که موږ له اوکراینیانو سره مرسته ونه کړو؛ نو روسیه به دا جګړه وګټي".
هغه زیاته کړه چې: "زه فکر کوم چې موږ لا ډېر څه کولی شو".
نوموړي وویل، چې کانګرس باید پر بایډن فشار راوړي چې د اوکراین سره د داسې یوې ستراتیژۍ په جوړولو کې مرسته وکړي چې څنګه دغه جګړه ګټلی شي.
د هغه په وینا؛ یوازې د روسیې له خوا د اوکراین د نیولو مخنیوی کافي نه دی.
پولټن زیاته کړه، چې اوکراینیان دا اندېښنه لري چې ښایي دوی د امریکا ځینې مرستې له لاسه ورکړي او ټینګار یې وکړې، چې اوکراین سره باید هغه مرسته وشي چې دوی ورته اړتیا لري.
د ملي امنیت پخواني سلاکار زیاته کړه، چې متحده ایالات باید په دې اړه اندېښمنه وي، چې روسیه هڅه کوي په احتمالي مذاکراتو کې برلاسه وي، په داسې حال کې چې روسیې عسکر په جګړه کې برلاسي نه دي.