د ایران د نشه یي توکو پر وړاندې د مبارزې د مرکزي دفتر عمومي منشي اسکندر مومني په افغانستان کې د توليدونکو نشه یي توکو د تولید په ډېرېدو د اندېښنې په څرګندولو سره وویل چې، دغه چاره د ایران او نړۍ لپاره د خطر زنګ دی.
ښاغلي مومني په یوه خبري کنفرانس کې رسنیو ته وویل چې، په افغانستان کې د کوکنارو د کښت د کمېدو ادعا د منلو وړ نه دی.
د ملګرو ملتونو له نشه یي توکو او جرمونو سره د مبارزې ادارې (يو اين او ډي سي) په خپل وروستي راپور کې په افغانستان کې د کوکنارو په کښت کې د ۹۵ سلنې کموالي خبر ورکړی.
د راپور له مخې، د کوکنارو د کښت له کمېدو سره په بازارونو کې د هغو بیه بیا لوړه شوې ده.
دغه سازمان زیاته کړې چې د تریاکو تولید او عرضه په ۲۰۲۲ کال کې له ۶۲۰۰ ټنو په ۲۰۲۳ کال کې ۳۳۳ ټنو ته راکمه شوې ده.
دا په داسې حال کې ده چې د طالبانو کورنیو چارو وزیر سراج الدین حقاني په افغانستان کې د ملګرو ملتونو د سرمنشي له استازې روزا اتنبایوا سره په لیدنه کې په افغانستان کې د نشه یي توکو د کښت، تولید او قاچاق کمول د یوې لاسته راوړنې په توګه یاد کړي دي.
