د طالبانو د سوداګرۍ او صنایعو وزارت اعلان وکړ، چې دې ډلې د هغو کډوالو سوداګرو او صنعتکارانو لپاره چې هېواد ته راستانه شوي د پنځه کلنې مالیې معافیت په ګډون ځانګړي امتیازات چمتو کړي دي.
د دغه وزارت د خبرپاڼې له مخې؛ طالبانو د دوی د ملاتړ لپاره یوه کمېټه جوړه کړې ده.
له پاکستانه د افغان کډوالو د ایستلو په اړه د دغه هېواد د سرپرست حکومت د پرېکړې له اعلان وروسته طالبانو د هغوی د ځای پر ځای کېدو لپاره یوه کړنلاره جوړه کړه، چې یوه برخه یې کډوالو سوداګرو ته د کار پېدا کول او ځای پر ځای کول وو.
د طالبانو د صنایعو او سوداګرۍ وزارت د سې شنبې په ورځ (لیندۍ ۱۴مه) د ایکس ټولنیزې شبکې په پاڼه کې په یوه یادښت کې لیکلي، چې د طالبانو د صنعت او سوداګرۍ د وزیر نورالدین عزیزي په مشرۍ یوه کمېټه جوړه شوې ده.
د دې ډلې له خوا د دې سوداګرو او صنعتکارانو د ملاتړ لپاره د مرستې غوښتنه وکړه.
د دغې خبرپاڼې له مخې؛ دغه سوداګر د پنځو کلونو لپاره له مالیې معاف شوي او پر دې سربېره به طالبان دوی ته په صنعتي پارکونو کې د فابریکو د جوړولو او د استوګنې په سیمو کې د کورونو د جوړولو لپاره ځمکې وېشي.
دغه خبر پاڼه زیاتوي، چې طالبان به د دې فرصت برابر کړي چې دغو سوداګرو ته "په سوداګریزو بندرونو کې" سیمه ییز دفترونه پرانیزي.
افغانستان په وچه کې راګیر هېواد دی او دا لا څرګنده نه ده چې طالبان غواړي د نورو هېوادونو په بندرونو کې د افغان سوداګرو لپاره دفترونه پرانیزي.
د موټرو او ماشینونو لپاره د برېښنا، ګاز او ګمرکي معافیت او د اوږدمهاله قونسلي خدماتو عرضه د هغو امتیازاتو برخه ده چې طالبانو د دغو سوداګرو لپاره په پام کې نیولي دي.
په ساده شرایطو کې د کانونو د قراردادونو سپارل او دغو سوداګرو او صنعتکارانو ته د بانکي خدمتونو وړاندې کول هغه نور هغه څه دي، چې د طالبانو د صنعت او سوداګرۍ وزارت ورته اشاره کړې ده.
دغه وزارت په خپله خبرپاڼه کې زیاته کړې، چې طالبان به د هغو کډوالو لپاره چې په دې وروستیو کې هېواد ته راستانه شوي، د استوګنې د ځانګړو ځایونو ترڅنګ صنعتي پارکونه او سوداګریز مرکزونه جوړوي.
طالبانو د دغې ډلې له خوا په نښه شویو سوداګرو او صنعتکارانو ته د دغو ځانګړو امتیازاتو د ورکولو او د هغې د مالي سرچینو د لګښت په اړه څه نه دي ویلي.
د پاچا خان ځدراڼ کشر ورور وزير خان د سې شنبې په ورځ (د ليندۍ په ۱۴ مه) افغانستان انټرنشنل – پښتو ته وويل، چې طالبانو څلور ورځې مخکې په خپلسري ډول پر کور شپنې عملیات کړې او وروسته یې د هغه د دوی کلا او جوړ کور ور نړولی دی.
ښاغلی وزیر وایي، چې طالبانو د کلا د نړولو پر مهال له دوی څخه د اسنادو غوښتنه نه ده کړې او په خپل سر یې د دوی کلا نړولې ده.
هغه زیاته کړه، د افغانستان په ډېرو سيمو کې طالبانو د اصلي غاصبينو د کورونو، ښارګوټو او اولادونو امنيت نیولی او قانون نه پرې پلی کوي.
که څه هم هغه د کوم مشخص غاصب نوم ياد نه کړ؛ خو د کابل د شېر پور سیمه یې یاده کړه چې ډېره ساحه یې غصب شوې ده.
هغه وویل، چې طالبانو د دوی کورنۍ پسې د غضب په نوم ګنګوسې خپرې کړي دي.
هغه زیاته کړه: «موږ قانوني اسناد لرو، له دې سره بیا هم طالبان په موږ پسې غلطې ګنګوسې خپروي، دا څنګه سوله او عدالت دی».
وزير خان ځدراڼ وایي، چې له دې پېښې شاوخوا څلور ورځې تېريږي؛ خو په خوست او کابل کې طالب چارواکي د کلا د نړولو دلیل نه په ډاګه کوي او د دوی پوښتنو ته ځواب نه وایي.
نوموړي له طالبانو غوښتي، چې د دې خپلسرې کړنې په اړه دې دوی ته ځواب ووایي.
نړول شوې کلا پاچا خان ځدراڼ ته د پخواني ولسمشر حامد کرزي د فرمان پر اساس ورکړل شوې وه.