عباس ستانکزی: د نجونو د تعلیم مخنیوی له نجونو سره ښکاره ظلم دی

AP ۱۴۰۲ لیندۍ ۱۶

د طالبانو د بهرنیو چارو وزارت سیاسي مرستیال عباس ستانکزی وايي، چې په افغانستان کې د نجونو پرمخ د ښوونځیو او پوهنتونونو بند پاتې کېدل د هغوی پر حقونو تجاوز او دوی سره ښکاره ظلم دی.‌

عباس ستانکزي چې د سرحدونو او قبایلو چارو وزارت د تعلیمي مرکزونو په فراغت غونډه کې خبرې کولې وویل، “هغه کسان چې د خپلو شخصي غوښتنو په خاطر له علم سره مخالفت کوي؛ دغه کار د دې ملک بچیانو سره یو لویه جفا ده.‌"

نوموړي ټینګار وکړ، چې د نجونو پرمخ باید په هېڅ صورت د علم دروازې بندې پاتې نه شي.

ستانکزي وویل؛ هغه کسانو چې د نجونو پرمخ تعلم بند کړی باید میدان ته راووځي او که کوم دلیل لري ټولو سره دې شریک کړي.

هغه ټینګار وکړ، چې تعلیم د هر انسان طبیعي حق دی او دا ورته خدای او رسول ورکړی دی.

هغه وویل هیڅوک دغه حق له چا نه شي اخیستلی. هغه زیاته کړه:‌ “هر څوک چې د تعلیم حق له نورو انسانانو اخلي، دا د هغوی پر حق تجاوز او پر خلکو ښکاره ظلم دی.”

ستانکزی وايي؛ د طالبانو، ګاونډیو او نړۍ ترمنځ یوازینۍ ستونزه د نجونو د تعلیم مساله ده او له همدې امله ډېری هېوادونه له دوی لري دي او یا ورسره اړیکي نه لري.

طالبانو شاوخوا دوه کاله وړاندې د شپږم ټولګی څخه پورته د نجونو په مخ لومړی ښوونځي او بیا پوهنتونونه وتړل.

دغې ډلې وروسته بیا په نړۍوال مرستندویه ادارو کې هم د ښځو پر کار بندیز ولګوه.

په پیل کې طالبانو ویلي وو، چې دا هرڅه به د میرمنو د تعلیم او کار لپاره د یو "اسلامي چارچوب” تر رامنځته کولو پورې بند وي؛ خو د دې ډلې تر واکمنې د څه د پاڅه دوو کلونو په تېرېدو سره لا هم نجونو د تعلیم او کار د اجازې ورکولو په اړه کوم پرمختګ نه دی شوی.

نور خبرونه

رادیو

ستاسو د غږ لپاره کور

خپل فلمونه او غږونه را ولېږئ