د روسیې ولسمشر تایید کړه چې د دغه هېواد د ۲۰۲۴ کال ولسمشریزو ټاکنو ته به یو ځل بیا ځان کاندید کړي. ولادیمیر پوتین دغه څرګندونې د جمعې په ورځ د روسیې له هغو پوځیانو سره په کتنه کې وکړې چې د اوکراین په جګړه کې یې برخه اخیستې وه.
ښاغلی پوتین چې له ۱۹۹۹ کال راهیسې په واک کې دی، د روسیې تر ټولو اوږد مهاله ولسمشر دی.
د روسیې ولسمشر د خپل هېواد پوځیانو ته دې ته په اشارې سره چې په ولسمشریزو ټاکنو کې ونډه اخلي وویل: «زه دا نه پټوم چې په بېلابېلو وختونو کې مې بېلابېل فکرونه درلودل، خو اوس د پرېکړې وخت رارسېدلی دی.»
د ولادیمیر پوتین لپاره، د روسیې ولسمشریزې ټاکنې یوازې یوه رسمي پروسه ده.
د پوتین لپاره د حکومت او دولتي رسنیو پرېکنده ملاتړ او همدارنګه په روسیه کې د یوه قوي اپوزیسیون د خوځښت نشتوالي د هغه بریا یقیني کړې ده.
په هرصورت، سره له دې چې پوتین د راتلونکي کال په ټاکنو کې ریښتیني سیالان نه لري، هغه پر اوکراین د برید له امله د لویدیځ له بندیزونو سره په مقابله کې له لویې ننګونې سره مخ دی.
