ټاکل شوې د ملګرو ملتونو امنیت شورا د جمعې په ورځ د لیندۍ په ۱۷ مه غونډه وکړي چې په غزه کې د سملاسي اوربند د غوښتنې په اړه رایه ورکړي. متحده عربي اماراتو د پرېکړه لیک مسوده چمتو کړې ده چې د جمعې په ورځ به رایې اچونې ته وړاندې شي.
دا پرېکړه تر هغه وروسته وشوه چې د ملګرو ملتونو سرمنشي انتونیو ګوترش د ملګرو ملتونو د منشور د ۹۹ مادې پر اساس یو بې ساری اقدام وکړ.
دا ماده هغه ته اجازه ورکوي چې شورا ته هر هغه مسله راوړي چې د هغه په فکر د نړیوالې سولې او امنیت ساتل ګواښي.
په تېرو لسیزو کې د ملګرو ملتونو د عمومي منشي په مقام کې هیڅ چا دا کار نه دی کړی.
ښاغلي ګوترش د چهارشنبې په ورځ شورا ته په یوه لیک کې وویل چې د اسراییل او غزې وضعیت «ښایي د نړیوالې سولې او امنیت ساتلو لپاره شته ګواښونه لاپسې زیات کړي. »
دا به د ملګرو ملتونو د امنیت شورا د غړو ترمنځ د یووالي د رامنځته کولو پنځمه هڅه وي.
تر دې مخکې په غزه کې د جګړې له پیل راهیسې څلور نورې مسودې وړاندې شوې چې د شورا له خوا رد شوې وې.
