رویټرز خبري اژانس په یوه ځانګړي تفصیلي راپور کې لیکلي چې، د دې خبري اژانس خبریال عصام عبدالله د اکټوبر په دیارلسمه په لبنان کې د یوه اسراییلي ټانک په برید کې ووژل شو. د راپور له مخې، د اسراییل په دغو دوو پرله پسې ډزو کې شپږ نور خبریالان چې پر ویډیو اخیستلو بوخت ول، ژوبل شوي و.
رویټرز لیکلي چې په دغه راپور کې يې د خپلو موندنو د تایید لپاره له ۳۰ څخه زیاتو حکومتي او امنیتي چارواکو، پوځي کارپوهانو، عدلي څیړونکو، وکیلانو، ډاکټرانو او عیني شاهدانو سره یې مرکې کړي دي.
دغه خبري آژانس په یاد راپور کې د معلوماتو د کره والي په موخه د رسنیو د څو ساعتونو ویډیوګانې او د سټلایټ عکسونه هم کتلي دي.
د دغه خبري آژانس د موندنو په ځواب کې د اسراییل د امنیتي ځواکونو ویاند ویلي چې د «اسراییل پوځ خبریالان نه په نښه کوي.»
نوموړي د نورو جزیاتو له ورکولو ډډه وکړه.
د رویټرز لوی مدير السانډرا ګالوني ویلي: «هغه شواهد چې موږ یې اوس لرو او نن خپاره شوي ښیې چې د اسراییلي ټانک په ډزو کې زموږ همکار عصام عبدالله وژل شوی دی.»
هغه له اسراییل وغوښتل چې د رویټرز خبریال د وژل کېدو او د نورو خبریالانو د ټپي کېدو مسوول تر څیړنو لاندې ونیسي.
د خبریالانو د ملاتړ کمېټې د راپور له مخې، د اسراییل او حماس ترمنځ په جګړه کې لږ تر لږه ۶۳ خبریالان وژل شوي دي.
