په ملګرو ملتونو کې د روسيې د استازي مرستيال وايي، که اسراييل د غزې تر ځمکې لاندې تونلونو ته د سمندر اوبه خوشې کړي، دا به "جنګي جرم" وي. دیمیتري پولیانسکي وویل، امکان لري ولسي وګړو د اسراییلي پوځ له بمبارۍ تر ځمکې لاندې تونلونو کې پناه اخیستې وي.
ملګرو ملتونو ته د روسیې د پلاوي د راپور له مخې، دیمیتري پولیانسکي د جمعې په ورځ «د لیندۍ په۱۷مه» د امنیت شورا په غونډه کې وویل: «جنګي جرمونه مخ په زیاتیدو دي. په دې وروستیو ورځو کې، په غزه کې د ځمکې لاندې جوړښتونو ته د سمندري اوبو د خوشي کولو په هکله د اسراییل د پلانونو ټکان ورکوونکي معلومات خپاره شوي.»
ښاغلي پولیانسکي زیاته کړه: "د معلوماتو له مخې، د اسراییل پوځ د پایپونو او پمپونو یو سیسټم جوړ کړی چې د سمندري اوبو پمپ کولو لپاره ډیزاین شوی او دا مهال له متحده ایالاتو سره د داسې یوه پلان د امکان په اړه خبرې کوي."
د روسیې د بهرنیو چارو وزارت مرستیال خبرداری ورکړی، چې د غزې په تونلونو کې د ولسي وګړو د اوسېدو ډېر احتمال شته.
دغه روسي ديپلومات څرګنده کړه چې پر غزې د اسراييل له بمباريو سره ملکي وګړې بل ځای د تګ لپاره نه لري او ښايي د غزې تر ځمکې لاندې تونلونو کې يې پناه اخيستې وي.
هغه وویل: "هغوی په روغتونونو، ښوونځیو، د کډوالو په کمپونو او د ملګرو ملتونو په تاسیساتو باندې له بمباریو او قصدي بریدونو بل چیرته تښتیدلی شي؟" لکه څنګه چې موږ نن د ملګرو ملتونو د عمومي منشي څخه واوریدل، هیڅ خوندي ځای نشته.»
په ملګروملتونو کې د روسیې د استازي مرستیال وویل: «لویدیځې رسنۍ په داسې حال کې چې د اسراییل پوځ د دغې فیصلې ستاینه کوی، حتی د دې پوښتنې د مطرح کولو هڅه هم نه کوی چې د سمندر د زرګونو متر مکعب د مالګینو اوبو اېستل به د ځمکې لپاره څه پایلې ولري؟»
وال سټریټ ژورنال مخکې راپور ورکړی و چې د اسراییل پوځ په پام کې لري چې غزه کې د حماس د تونلونو شبکې ته سمندري اوبه پمپ کړي.
