افغانستان انټرنشنل ـ پښتو ته داسې اسناد په لاس ورغلي، چې ښيي د خېبر پښتونخوا په ډېره اسماعیل خان کې د پاکستاني پولیسو پر مرکز موټر بم برید یوه افغان طالب کړی دی. د معلوماتو له مخې؛ دغه ځانمرګی بریدګر قاري شاکر نومیږي او د هلمند د موسا کلا ولسوالۍ د «شا رګې» کلي اوسېدونکی دی.
د پاکستان پوځ نن ومنله چې ډېره اسماعیل خان کې د پولیسو پر مرکز په موټر بم برید کې یې ۲۳ سرتېري وژل شوي دي.
د پاکستان اسلامي جهاد په نوم وسلوالې ډلې د دې برید مسوولیت منلی دی.
د هلمند د ځايي طالب چارواکو د وټساپ غږونو له مخې؛ دغه برید د قاري شاکر په نوم د موسا کلا ولسوالۍ یوه اوسېدونکي کړی دی.
د قاري شاکر په نوم دغه ځوان یو ویډیویي پیغام هم خپور کړی او پکې وايي:«خپلې جهادپاله او شهادتپاله کورنۍ ته مې دا پیغام دی، چې زما کورنۍ دې زما د شهادت په اړه دې نه خفه کیږي، کله چې زما د شهادت په اړه خبر شي دوه رکعته د شکر نفل دي ادا کړي او شکر دې وباسي چې زه په دې لاره کې شهید شوم.»
نوموړی د یاد پیغام په دوام وايي، چې د ټولو مسلمانانو انتقام به په خپلو لاسونو اخلي او خلک جهاد ته رابولي.
سرچینې افغانستان انټرنشنل ـ پښتو ته وايي؛ د قاري شاکر په نوم یاد بریدګر د مولوي فرقاني په نوم د هلمند د موسا کلا ولسوالی د اوسیدونکي ورور دی او کورنۍ یې د تېرو څو کلنو راهیسې په پاکستان کې ژوند کاوه.
هلمند کې ځايي طالب چارواکو هم له یو بل سره د وټساپ په پیغامونو کې ویلي، چې د موسا کلا اوسېدونکي قاري شاکر نن درې بجې په پاکستان کې ځانمرګی برید کړی دی.
په یوه وټساپ پیغام کې یو طالب له نورو غواړي چې د عکس خپرولو سره له نورو ملګرو هغه ته بښنه وکړي.
پاکستان تل پر طالب چارواکو تور پورې کوي، چې په افغان خاوره کې یې وسلوال ساتلي او د دغه هېواد په تاوتریخوالي کې افغان طالبان هم ګډون لري.
څه مهال مخکې د پاکستان حکومت وویل د روان میلادي کال کې ۱۴ ځانمرګي بریدونه افغانانو کړي دي.
که څه هم د طالبانو مشر ملا هبت الله په پاکستان کې د بریدونو پرضد فتوا ورکړې او د دې ډلې دفاع وزیر ملا یعقوب هم طالب چارواکو ته سپارښتنه کړې، چې بهر به جګړې ته نه ځي؛ خو داسې ښکاري چې طالبان دا امرونه نه مني.
