د طالبانو د اطلاعاتو او فرهنګ وزارت سرپرست ملا خیرالله خیرخواه په یوه غونډه کې د وینا پر مهال وویل، چې په افغانستان کې قومي، ژبني او سمتي اختلافات پای ته رسېدلي، خو یو شمېر رسنۍ بیا برعکس دغو اختلافاتو ته د پردیو په اشاره لمن وهي.
نوموړي سره له دې چې د کومې مشخصې رسنۍ نوم نه دی اخیستی، خو وایي چې اختلافاتو ته لمن وهل د دوی د پالیسۍ خلاف عمل دی.
د طالبانو د اطلاعاتو او کلتور وزارت سرپرست ملا خیرالله خیرخوا نن چهارشنبې (د لیندۍ ۲۹مه) په یاده غونډه کې په خپلو خبرو کې له لیکوالانو غوښتنه وکړه، چې د هغو خلک پر وړاندې چوپ پاتې نه شي، چې څوک د نورو په لمسون په ټولنیزو رسنیو کې لیکنې کوي.
دا خبرې په داسې حال کې مطرح کیږي چې پر افغانستان د طالبانو له واکمنۍ وروسته دغې ډلې له ښځو وروسته ډېری بندیزونه پر رسنیو لګولي دي.
خو په ورته وخت کې بیا د طالبانو سیاسي مخالفین دا ډله په قومي او ژبني تعصب تورنوي او وايي، چې دغه ډله په چارو او واک کې نورو اقوامو ته ځآی نه ورکوي.
خو طالبانو بیا په ځلونو دغه ادعاوې رد کړي دي او پر ملي یووالي ټینګار کوي.
