مدني فعال عبدالحکيم الفت افغانستان انټرنشنل - پښتو ته وویل، چې د طالب استخباراتو سره تر يوې مياشتي بند تېرولو وروسته نن د خپلي کورنۍ سره يو ځای شو. نوموړي میاشت وړاندې يوه طالب پلوه ته پر فېسبوک د يوې تبصرې په لیکلو د طالبانو له خوا بندي شو.
عبدالحکيم الفت وايي، چې نن چهار شنبه د استخباراتو په زندان کې تر يوې مياشتي تېرولو وروسته د ابتدايه محکمې په امر خوشې شوی.
الفت یوه طالب پلوه ته په کمېنټ کې د نجونو د بندو ښوونځيو، د لوړو زده کړو د بندو مرکزونو، پر ډېورنډ کرښه د افغان مېرمنو د ځورونو، د زياتو اقتصادي ستونزو او د بې دندو ځوانانو اړوند يو کمېنټ کړی و.
هغه په بند کې له نوموړي سره د چلند او له بند وروسته د ټولنيزو رسنيو د فعاليت د ډول په اړه معلومات ورنه کړه.
د طالبانو واک ته له رسېدو سره دغه ډلې په افغانستان کې بیان ازادي او رسنیو باندې محدودیتونه ولګول.
طالبانو په افغانستان کې رسنۍ سانسور کړې دي او هېڅ رسنۍ د دغې ډلې په خلاف منفي راپورونه نه شي نشرولی؛ بلکې په ټولنیزو رسنیو کې هم عام خلک له دغه کاره منع شوي دي.
تر اوسه پورې یې ګڼ شمېر د ټولنیزو رسنیو فعالان شکنجه او زنداني کړې دي.
