له سي بي ایس تلویزون سره د کاناډا لومړي وزیر جسټن ټروډو په یوې مرکې کې نن پنجشنبه ویلي، چې د اسراییل نېږدې ملګري اندېښمن دي، چې په غزه کې د دې هیواد پوځي عملیات د اسراییل اوږدمهاله امنیت ګواښي.
ټروډو زیاته کړه، چې د اسراییل نېږدې ملګري "په زیاتیدونکې توګه اندیښنه لري چې لنډ مهاله اقدامات چې اسراییل یې کوي په حقیقت کې به د دې یهودي دولت لپاره اوږدمهاله امنیت او حتا راتلونکی ملاتړ له خطر سره مخامخ کړي.
رویټرز خبري اژانس لیکلي، چې د ټروډو څرګندونې په غزه کې د ملکي تلفاتو د زیاتېدو په اړه د اسراییل د متحدینو د اندېښنې وروستۍ څرګندونې دي.
د کاناډا لومړي وزیر تل د حماس د بریدونو پر وړاندې د اسراییل د دفاع پر حق ټینګار کړی دی.
بل خوا د تېرې سې شنبې په د اسراييل ولسمشر اسحاق هرزوګ ويلي، چې د نورو یرغمل شویو کسانو د خوندي خوشې کولو لپاره چې د حماس له خوا نیول شوي دي، هېواد يې په غزه کې له حماس سره د نوي موقتي اوربند هوکړې ته لېوال دى؛ خو تر اوسه عملیات او بمباري نه ده درېدلې.
هرزوګ په تل ابیب کې د سفیرانو یوې غونډې ته وویل: «اسراییل د یرغمل شویو کسانو د خوشې کولو لپاره یوې بلې بشري وقفې او اضافي بشري مرستو لپاره چمتو دی.»
حماس وايي؛ تر هغه به د بنديانو د خوشې کولو په اړه خبرو ته حاضر نه شي، چې اسراييل په غزه کې خپله جګړه پای ته نه وي رسولې.
دا څرګندونې په داسې حال کې کېږي، چې پر اسراییل د نړۍوالو فشارونه زیات شوي چې پر غزې خپل بریدونه ودروي او محاصره شوې سیمې ته د بشري مرستو د رسولو اجازه ورکړي.
د پاکستاني رسنیو د راپورونو له مخې د پلازمېنې پولیسو د لاریون کوونکو د مشرې ماه رنګ بلوڅې په ګډون تر ۲۵۰ تنه د لاریون مخکښ کسان او سمبالوونکي نیولي دي.
بلوڅو لاریونوالو د اسلام اباد په ۲۶ نمبر چوک کې د پرلت خیمې وهلې وې او همدارنګه د اسلام اباد پریس کلب مخې ته هم راغونډ شوي و.
د اسلام اباد پولیسو رسنیو ته ويلي چې لاریون کوونکو پرې د کاڼو ګوزارونه کړي، نو ځکه یې دوی په نیولو لاس پورې کړی، پولیس وايي په سلګونو لاریون کوونکي په دغه ښار کې خواره شوي او دوی یې د نیولو هڅې کوی.
ويل کیږي د اسلام اباد پولیسو د لاریون کوونکو درول شوې خیمې ړنګې او د هغوی غږیز لوډسپیکرونه یې ترې وړي، نیول شوي لاریون کوونکي ابپاره، کوهسار، سکرتریت او مارګلې پولیسو سټیشنونو ته لیږدول شوي.
د اسلام اباد پولیسو پرون د جبري بې درکه کولو او غیر عدالتي وژنو پر ضد د بلوڅ ښځو په مشرۍ د لانګ مارچ د ګډونوالو په وړاندې لارې وتړلې او بلوڅ لاریون کوونکي یې ونیول.
د رسنیو د معلوماتو له مخې پولیسو د پلازمېنې اسلام اباد ښار کې دننه هغه لارې وتړلې چې اسلام اباد پرېس کلب ته غځېدلې وې.
د بښنې نړېوال سازمان په اېکس پاڼه د پاکستاني پولیسو له لوري له بلوڅ لاریون کوونکو سره شوی تاوتریخوالی غندلی او لیکلي یې دي چې پر لاریون کوونکو د پولیسو له لوري د ډنډو، اوښلن ګاز او اوبو پاشل د آزادۍ، امنیت او د لاریون د حقونو خلاف عمل دی.
د بښنې نړیوال سازمان د پاکستان له حکومته غوښتي چې سملاسي دې ټول لاریون کوونکي خوشې کړي، د دوی د بیان د ازادۍ او لاریون د حق د کارولو لپاره پر دوی لګول شوي تورونه دې لرې کړي او له نړیوالو معیارونو سره سم دې په بلوچستان کې د ټولو بې عدالتي وژنو او جبري ورکیدو په اړه دې بې پرې څېړنې وشي.
بلوڅ فعالان وايي، د بلوڅ توکم وژنې ضد لاریون په اسلام اباد کې د پولیسو له تاوتریخوالي سره مخ شوی او ډېر لاریونوال یې ټپي او نیول شوي دي.
د پاکستان امینتي ځواکونو د چارشنبې په ورځ اسلام اباد ته پر لار هم د دغه لاریون د مخینوي هڅه کوله، خو بیا هم د بلوڅانو دا اعتراض تر پلازمېنې ورسېد.
د زرګونو بلوڅانو دا لاریون د بلوچستان له تربته پیل شوی او په ډېره غازي خان کې تر پرلت وروسته یې د چارشنبې په ورځ اسلام اباد ته مخه وکړه.
خواله رسنیو کې ویډیووې هم ښيي چې پولیس لاریونوال وهي او ځینې په ټپي حالت کې د نورو ملګرو په غېږو کې پراته دي.
یوې فعالې ماه رنګ بلوڅ د ورته ویډیوو له نشرولو سره لیکلي چې د دې او ځینې نورو بلوڅ پېغلو په ګډون د لاریون نور ځوانان هم نیول شوي دي.
د بلوڅانو پرلت په تېره نومبر میاشت کې د پاکستان بلوچستان ایالت په تربت کې وروسته له هغه پیل شو چې د دغې سیمې خلکو د صوبې د ترهګرۍ ضد څانګې «سي ټي ډي» په چارواکو تور ولګاوه، چې د ۲۴ کلن بلاڅ بلوڅ تر وژنې وروسته یې په هغه د پنځه کیلوګرامه چاودېدونکو توکو د درلودلو تور لګولی و.
د بلوچستان ایالت اوسېدونکي له کلونو راهیسې ادعا کوي چې د پاکستان حکومت یې د حق غوښتلو پر مهال مخکښ کسان نیسي او له هغه وروسته يې مړي ژوندي ورک دي.
د پاکستان حکومت بیا دا تورونه رد کړي دي.