پر اوکراین د روسیې توغندیز برید ته په اشارې جوبایډن وویل، له دغه بریده داسې ښکاري چې د« پوتین مخه باید نوره ونیوله شي». د اوکرایني چارواکو په وینا، دغه برید د شنبې په شپه چې «د اوکراین په جګړه کې تر ټولو ستر هوايي برید» ګڼل کېږي شوی دی.
ویل کېږي، چې د دغه برید له امله ۳۱ تنه ولسي خلک وژل شوي او ۱۶۰ نور ټپیان شوي دي.
د امریکا ولسمشر چې دا مهال په رخصتۍ دی، په یوه وینا پاڼه کې ولیکل:« دغه برید نړۍ ته دا وریادوي، چې د تېرو شاوخوا دوو کالو په ویجاړونکې جګړه کې، د پوتین موخه نه ده بدله شوې او هغه د اوکراین د ویجاړولو او پر خلکو یې د واکمنۍ هوډ لري، باید د هغه هڅې نورې ودرول شي.»
هغه دا رنګه زیاته کړې، چې اوکراین د امریکا او د هغې د متحدینو د هوايي مدافعې سیستم څخه د روسیې د توغندیزو بریدونو په شنډولو کې کار اخیستی.
د امریکا ولسمشر یو ځلې بیا له کانګرسه وغوښتل، چې له اوکراین سره د پوځي مرستو غوښتنې ومني.
جوبایډن وویل، تر هغې چې کانګرس په نوي راتلونکي کال کې عملي ګام وانخلي، متحده ایالات نه شي کولای له اوکراین سره د نوي پوځي تجهیزاتو مرستو ته دوام ورکړي.
پر اوکراین د روسیې د شنبې د شپې برید د امنیت شورا په یوې بېړنۍ ناسته کې د امریکا، بریتانیا او فرانسې لهخوا وغندل شو.
خو په ملګرو ملتونو کې روسي استازي وویل، چې مسکو یوازې پر پوځي زېرمو برید کړی او د اوکراین د هوايي دفاعي سیستم یې د ولسي وګړو په مرګ ژوبله کې پړ وباله.
