د طالبانو د کرنې، اوبو لګونې او مالدارۍ وزارت په خبرپاڼه کې راغلي، چې د کابل د ولسوالیو د کرنېزو خدمتونو مدیریت د راپور پر بنسټ د تېر کال پرتله سږکال د انګورو حاصلاتو کې د پام وړ زیاتوالی راغلی.
د دغه وزارت په وینا، روان کال بڼوالو خپل حاصلات په کورنیو او بهرنیو بازارونو کې په ښه بیه پلورلي او په دې برخه کې یې ښه عاید ترلاسه کړی.
د کابل د زراعت ریاست د چارواکو د مالوماتو پر بنسټ، روان کال د ۱۲۶۱۱ هکټاره د انګورو له بڼونو څخه ۲۳۲۱۷۵ ټنه انګور راټول شوي دي.
دا په داسې حال کې ده، چې تېرکال له ۱۱۵۴۵ هکټاره د انګورو له بڼونو څخه ۱۱۲۴۴۸ ټنه انګور راټول شوي وو.
دغه وزارت وایي، چې د کابل د کرنیزو چارو امریت بڼوالو ته د یو لړ ښوونیزو پروګرامونو او په خپل وخت د مرستو رسونې له امله د حاصلاتو کچه لوړه کړې ده.
خو یو شمېر بڼوال بیا پر طالبانو نیوکه کوي، چې د حاصلاتو د خرڅلاو او صادراتو پر مهال پر دوی د ګاونډي هېواد پاکستان لهخوا په بېلابېلو پلمو دروازې تړل کېږي؛ خو دغه چارواکي تر اوسه نه دي توانیدلي، چې د دوی ستونزې په سوداګریزه برخه کې له ګاونډیانو سره له ډیپلوماټیکو لارو هوارې کړي.
