د سره صلیب د نړۍوالې کمېټې د افغانستان څانګې مشرې کاترینا ریځ پرون چهارشنبه په خپله اېکس پاڼه لیکلي، د سره صلیب نړۍواله کمېټه ژمنه ده، چې په ۲۰۲۴ کال کې هم د تېر په څېر د خپلو همکارو ادارو او د سرې میاشتې له ټولنې سره په ګډه په افغانستان کې د زیانمنونکو خلکو لاس نیوی وکړي.
د سره صلیب نړۍواله کمېټه چې له څو لسیزو په افغانستان کې کار کوي په بېلابېلو بشري برخو او روغتیايي سکټور په برخه کې کار کوي، چې تر ټولو ستر کار یې په جګړه کې د معلولو کسانو لاسنیوی او د هغوی په ځان بسیاینه ده.
د سره صلیب د نړۍوالې کمېټې تر وروستۍ اندېښنې مخکې ملګرو ملتونو هم ویلي و، چې دا مهال په افغانستان کې څه باندې ۲۹ مېلیونه وګړي بشري مرستو ته اړتیا لري او د ۲۰۲۴م کال په لومړیو درېیو میاشتو کې به هم ۱۵ مېلیونه ۷۰۰زره افغانان کافي خواړه ونه لري.
