د ملکرو ملتونو د کډوالو عالي کمیشنرۍ (یواینایچسيآر) دفتر وايي چې، ۹۰ تنو ښځو ته یې د بریل (د نابینا الفبا) زدهکړې ورکړې چې په دې سره به دوی ته د زدهکړې نوي فرصتونه هم برابر شي.
په افغانستان کې د ملګرو ملتونو د کډوالو عالې کمیشنیرۍ دفتر د پنجشنبې په ورځ د (مرغومي ۱۴مه) پر خپله اېکس پاڼه لیکلي چې (يواینایچسيآر) د ودان موسسي په مرسته د افغانستان په ختیځ کې ۹۰ نابینا ښځو ته د بریل ( د نابینا الفبا) زدهکړې ورکړې او په دې سره یې هغوی ته د زده کړو نوي فرصتونه برابر کړي دي.
همدارنګه دغه دفتر لیکلي چي، دغه نابینا ښځو د رواني ټولنیزو مشورتي ورکشاپونو او مسلکي روزنیزو پروګرامونو کې هم برخه اخیستې وه.
که څه هم په افغانستان کې د نابینا ښځو کره شمېرې په لاس کې نه شته خو ډیر کم نابینا کسان د بریل زدهکړو ته لاسرسی لري.
دغه نابینا ښځې په داسې حال کې د بریل الفبا زدهکړې کوي چې پر افغانستان د طالبانو له واکمنېدو وروسته په افغانستان کې تر شپږم تولګي پورته د میلیونونو افغان نجونو پر مخ د ښوونځیو دروازې تړل شوې دي.
