انټرنیوز موسسه وایي؛ پر افغانستان د طالبانو له واکمنۍ وروسته کره اطلاعاتو ته د افغانانو لاسرسی کم شوی دی. د دغې موسسې نوې څېړنه ښيي، چې سخت محدودیتونه او سانسور د دې لامل شوي چې پر دولتي او خصوصي رسنیو د خلکو باور کم شي.
د دې څیړنې له مخې؛ د طالبانو له واکمنېدو وروسته په افغانستان کې اطلاعاتي اکوسیسټم په بې سارې توګه بدل شوی دی.
د دغو څېړنو موندنې ښيي، چې د رسنیو پر محتوا د طالبانو کنټرول د دې لامل شوی، چې د طالبانو تر واک لاندې په دولتي او خصوصي رسنیو د خلکو باور له منځه ولاړ شي.پر افغانستان د طالبانو له بیا واکمنۍ وروسته د رسنیو پر فعالیتونو او د بیان پر ازادۍ پراخ محدودیتونه لګېدلي دي.له دغو محدودیتونو سره ډېری رسنۍ بندې شوې او یا هم د ځینو رسنیو فعالیتونه محدود شوي دي.له دې سره یو شمیر خبریالان بیا د طالبانو د امر د نه پر ځای کولو له امله نیول شوي او بندیان شوي دي.د دې څېړنې په یوه برخه کې انټرنیوز ویلي، چې پر ښځو محدودیتونه هم ډېر سخت وو او له غیر رسمي سرچینو څخه معلوماتو ته د ښځو د لاسرسي د کمېدو لامل شوی دی.دا څېړنه ښيي، چې په افغانستان کې ښځې د سړو په پرتله معتبرو معلوماتو ته لږ لاسرسی لري.انټرنیوز ټینګار کړی، چې په افغانستان کې ځینې ښځې او نجونې د بې سوادۍ او د معلوماتو د خلا له امله نه شي کولی د ټولنیزو رسنیو یا انټرنیټ څخه خبرونه یا روغتیایي معلومات ترلاسه کړي.
