د طالبانو ویاند وايي، د رسنیو قانون د توشیح لپاره د دې ډلې مشر ته استول شوی او هغه به تر خپلې ارزونې وروسته د دې قانون په هکله پریکړه وکړي. ذبیح الله مجاهد زیاتوي، دا قانون د اطلاعاتو او کلتور، د امربالمعروف او عدلیې وزارتونو تر ارزولو وروسته ملا هبت الله اخوند ته استول شوی.
ذبیح الله مجاهد نن ددغې ډلې تر واک لاندې ملي راډیو ټلویزون سره په خبرو کې ویلي، دغه نوی قانون د اسلامي احکامو پربنسټ جوړ شوی دی.
خود خبریالانو د ملاتړ سازمان مشر حامد عبیدي وایي، چې تر دې مخکې د اسلامي احکامو په ګډون د رسنیو هر اړخیز قوانین شته او نوي قانون ته اړتیا نشته.
نوموړي افغانستان انټرنشنل پښتو ته وویل: «تر دې وړاندې د رسنیو قوانین او تګلاره د ټولنیز حقوق او اسلامي احکامو پربنسټ جوړ شوی و او ددې قانون په دویمه ماده کې د فکر او بیان د ازادۍ له حق څخه د خبریالانو ملاتړ او تضمین، د خبریالانو له حقونو څخه ملاتړ او د ازادو رسنیو د فعالیت د شرایطو برابرول، د اسلامي اصولو او احکامو په رعايتولو سره د بيان د ازادۍ او د ډله ييزو رسنيو د اصولو رعايتول هغه څه دي چې په مشخصه توګه پکې شامل دي.»
یو شمیر خبریالان بیا د طالبانو له خوا ددغو قوانینو بدلول ښکاره سرغړونه او په رسنیو د محدودیتونو د زیاتولو په معنا بولي.
افغان خبریال رفیع الله نیکزاد وایي، چې د رسنیو په چارو کې لاسوهنه او د محدودیتونو زیاتول د دې لامل شوي، چې ډیری خبریالان د رسنیو کارونه پریږدي او بیلابیلو هیوادونو ته کډوال شي.
د خبریالانو ملاتړ سازمان هم د ۲۰۲۳ میلادي کال په کلني راپور کې د طالبانو د حاکمیت له پیل څخه تراوسه پورې په رسنیو د طالبانو د ۱۴ بندیزونو د لګیدو خبر ورکړ.
د دې راپور له مخې، په دغه موده کې څه باندې ۳۰۰ رسنیو خپل فعالیتونه بند کړي او پاتې نورو یې د سختو اقتصادي شرایطو او بندیزونو له امله خپل کارکوونکي کم کړي دي.
