د سپینې ماڼۍ د ملي امنیت شورا ویاند د یکشنبې په ورځ وویل، د اسراییل لپاره دا مناسب وخت دی چې د غزې په تړانګه کې خپل پوځي عملیات کم کړي؛ دغه ځرګندونې داسې مهال کېږي، چې تازه اسراییلي چارواکو یو ځل بیا څرګنده کړې چې په سیمه کې د حماس پر وړاندې به خپلو عملیاتو ته دوام ورکړي.
جان کربي له سي بي اېس سره په خبرو کې وویل، چې امریکا په غزه کې "د عملیاتو راکمولو"په اړه له اسراییل سره خبرې کوي.
هغه وایي:« موږ باوري یو، چې دا د عملیاتو راکمولو لپاره یو مناسب وخت دی او موږ اسراییل سره د دغه ګام د اوچتولو په اړه خبرې کوو.»
کربي وویل، چې اسراییل د خپلو عملیاتو راکمولو لپاره ځینې "ګامونه" اخیستي دي؛ خو په وینا یې ډېر نورڅه هم باید وشي.
تر دې وړاندې د اسراییل لومړي وزیر بنیامین نتنیاهو ژمنه کړې وه، چې د حماس د له منځه وړلو اود دغې ډلې لخوا تر ۱۰۰ زیات یرغمل شويو اسراییلیانو د خلاصون لپاره به خپل فشار ته دوام ورکړي.
پوره سل ورځې وړاندې د اسراییل او حماس جګړه پیل شوه او په دغې جګړه کې د فلسطیني قربانیانو شمېر له ۲۴زرو واوښت.
تېره اونۍ هم سیمې ته د سفر په ترڅ کې د امریکا د بهرنیو چارو وزیر انتوني بلېنکن په اسراییل غږ وکړ، چې د ملکي تلفاتو د کمولو هڅه دې وکړي او غزې ته د بشري مرستو په رسولو کې دې زیاتوالی راولي.
