د افغانستان په چارو کې د ایران د ولسمشر استازی حسن کاظمي قمي اسلام اباد ته له خپل سفر وروسته وویل، د افغانستان مسله د سیمې د هېوادونو په بهرني سیاست کې تر ټولو مهمه مسله ده. ښاغلي قمي ویلي چې، د سیمې امنیت او ټیکاو د افغانستان امنیت او ټیکاو سره تړلی دی.
ښاغلي قمي د روانې مرغومي میاشتې په ۲۴مه نېټه د یوه پلاوي په مشرۍ پاکستان ته سفر وکړ.
نوموړي په دغه سفر کې د پاکستان د سرپرست حکومت د بهرنیو چارو له وزیر عباس جېلاني او د افغانستان په چارو کې د پاکستان له ځانګړي استازي اصف دراني سره وکتل.
نوموړی چې په کابل کې د ایران د سفارت مسوولیت هم لري، له پاکستاني چارواکو سره د خپلو لیدنو په اړه یې وویل:« په هغو خبرو کې چې موږ له پاکستاني چارواکو سره درلودلې، د سیمهییزو همکاریو په برخه کې د عملي ګامونو په اخیستلو ټینګار وشو او موږ هوکړه وکړه، چې په دې برخه کې دې د سیمهییزو اړیکو یوه ډله جوړه شي او هغه هېوادونه چې په افغانستان کې برخه اخلي، په اوسنيو حالاتو کې د افغانستان د حالاتو د ښه کولو لپاره د تېر پرتله ډېر فعال کار وکړي.»
ایران په روانه میاشت کې د مسکو په وروستۍ غونډه کې د سیمهییزو تماسونو د ډلې د جوړولو پلان وړاندې کړ.
ښاغلي قمي له صدا او سیما خبري اژانس سره په مرکه کې وویل:« نور اوس هم د خپلو شومو موخو لپاره د افغانستان له جغرافیې څخه د ناوړه ګټې اخیستنې هڅه کوي. په داسې یوه حالت کې طبیعي ښه خبره دا ده، چې د افغانستان سره د مرستې لپاره سیمهییزه همکاري رامنځته شي.»
تر دې وړاندې هند هم د تماس ډلې د جوړېدو ملاتړ کړی و.
د سیمې هېوادونو په ځلونو په افغانستان کې د ترهګرو ډلو د شتون په اړه اندېښنه ښودلې ده.
په ورته وخت کې دوی غواړي، طالبان قانع کړي چې له نورو سیاسي ځواکونو سره یو اېتلافي حکومت جوړ کړي.
