د پوليو ناروغۍ د ارزونې او همغږۍ کلنۍ غونډه تېره ورځ د طالبانو د عامې روغتیا وزارت، د ولایتونو په کچه د دغې ډلې د عامې روغتیا رییسانو، د پولیو ادارې استازو، د روغتیا نړۍوال سازمان استازو او ګڼ شمېر روغتیا پالانو په ګډون ترسره شوه.
د طالبانو د عامې روغتیا وزارت چارسمبالی وزیر وایي:« زموږ له راتګ سره د لومړي ځل لپاره په ۲۰۲۲ او ۲۰۲۳ کلونو کې په ټول هېواد کې د پولیو یوازې ۸ مثبتې پېښې ثبتې شوې، چې دا د پولیو د پېښو په کنټرول او مخنیوي کې یوه ستره لاسته راوړنه ده.»
د طالبانو د عامې روغتیا وزارت ویلي، چې په دغه غونډه کې د وینا پر مهال د دغه وزارت چارسمبالي قلندر عباد پولیو د افغانستان لپاره یو ستر ګواښ یاد کړ.
هغه زیاته کړې، چې د عامې روغتیا وزارت د دغې ناروغۍ د کنټرول او مخنیوي اړوند د روغتیا نړۍوال سازمان، بېلګېټس بنسټ او ورته نورو بنسټونو له استازو سره غونډې او بحثونه ترسره کړي دي.
ښاغلي عباد ۲۰۲۴ کال د پولیو ناروغۍ د له منځه وړلو او کنټرول لپاره وروستی کال یاد کړ.
هغه ویلي، د عامې روغتیا وزارت د خپلو شریکانو سره یو ځای په پام کې لري چې د روان ۲۰۲۴ زیږدیز کال په ترڅ کې په ټول هېواد کې د پولیو واکسین د تطبیق څلور کمپاینونه ترسره کړي.
تر دې وړاندې په ننګرهار ولایت کې د پولیو تازه پېښې ثبتې شوې وې.
له بلې خوا د ملګرو ملتونو د ماشومانو د ملاتړ صندوق یونېسف یو چارواکي تر دې وړاندې ویلي و، چې په لنډه موده کې په ننګرهار کې د پولیو د درېیو مثبتو پېښو ثبتېدل د اندېښنې وړ خبره ده.
د هغه په وینا، د پولیو ویروس په سیمه کې فعال دی او د افغانستان نورو سیمو ته یې د پراخېدو ګواښ هم زیات دی.
