د ایران د اسلامي جمهوریت د بهرنیو چارو وزارت د یوې اعلامیې په خپرولو سره د پاکستان وروستی برید یو "غیر متوازن او د نه منلو وړ عمل" بللی او ویلي یې دي، چې د خلکو امنیت او د دغه هېواد ځمکنۍ بشپړتیا د ایران سره کرښه ده.
د ایران د بهرنیو چارو وزارت په اعلامیه کې راغلي، چې له پاکستان څخه په کلکه تمه لري چې "د پاکستان په خاوره کې د اډو او وسله والو ترهګرو ډلو د جوړولو د مخنیوي" په برخه کې پر خپلو ژمنو عمل وکړي.
د اعلامیې په یوه برخه کې راغلي: "د پاکستان د دوست او ورور حکومت حساب له وسله والو ترهګرو جلا دی او ایران تل د خپل ګاونډيتوب سیاست ته غاړه ایښې ده."
وروسته له هغې چې ایران د پاکستان د بلوچستان پر صوبې توغندیز او د ډرون الوتکو برید وکړ؛ پاکستان په ځوابي برید کې د ایران د سیستان - بلوجستان ولایت په نښه کړ.
پاکستاني چارواکو ویلي، چې په دغه برید کې یې د بلوچ بېلتونپالو مهم قوماندان وژلي دي.
دوی زیاته کړې، چې په وژل شویو کې د بلوچ د خپلواکې جبهې قوماندان دوستا الیاس د دې جبهې غړی بجار الیاس سوغات په ګډون د بلوچ قوماندان اسغر الیسا بشام زوی او خور یې هم شامل دي.
د سیستان - بلوچستان د ولایت امنیتي مرستیال جاوا مرحمتي ایراني رسنیو ته ویلي، چې د پاکستان له لوري په سرحدي سیمه کې یو کلي په توغندیو لګیدلی او په دې پیښه کې درې مېرمنې او څلور ماشومان وژل شوي دي.
ښاغلي مرحمتي ویلي، چې وژل شوي کسان ایراني وګړي نه دي.
تر دې وړاندې د ایران دولتي خبري اژانس تسنیم خبر ورکړی و، چې نن سهار د سیستان - بلوچستان ولایت پر یوه سرحدي کلي له برید وروسته په تهران کې د پاکستان شارژدافیر د بهرنیو چارو وزارت ته ورغوښتل شوی، چې د پېښې په اړه وضاحت ورکړي.
