پر پاکستان د ایران د پوځي برید او د دغه هېواد د برید په غبرګون کې د پاکستان د برید په اړه د امریکا ولسمشر جوبایډن ویلي، دغو بریدونو وښوده چې "په سیمه کې هېڅوک د ایران اسلامي جمهوریت دریځ نه مني."
نوموړي نن پنجشنبه ( د مرغومې ۲۸مه) ویلي، چې په یمن کې به د حوثي وسلوالو پر مرکزونو هوايي بریدونه دوام ولري.
هغه همدا راز د اوکراین پر دوامدار ملاتړ ټینګار وکړ او څرګنده زیاته یې کړه، چې امریکا د سیمې وضعیت له نېږدې څاري.
په ورته وخت کې د اسراییل لومړي وزیر بنیامین نتنیاهو هو ویلي، چې ایران د حوثي یاغیانو او حزب الله تر شاه ولاړ دی او د ترهګریزو ډلو ملاتړ کوي.
وروسته له هغې چې ایران د پاکستان د بلوچستان پر صوبې توغندیز او د ډرون الوتکو برید وکړ؛ پاکستان په ځوابي برید کې د ایران د سیستان - بلوجستان ولایت په نښه کړ.
پاکستاني چارواکو ویلي، چې په دغه برید کې یې د بلوچ بېلتونپالو مهم قوماندان وژلي دي.
دوی زیاته کړې، چې په وژل شویو کې د بلوچ د خپلواکې جبهې قوماندان دوستا الیاس د دې جبهې غړی بجار الیاس سوغات په ګډون د بلوچ قوماندان اسغر الیسا بشام زوی او خور یې هم شامل دي.
د سیستان - بلوچستان د ولایت امنیتي مرستیال جاوا مرحمتي ایراني رسنیو ته ویلي، چې د پاکستان له لوري په سرحدي سیمه کې یو کلي په توغندیو لګیدلی او په دې پیښه کې درې مېرمنې او څلور ماشومان وژل شوي دي.
ښاغلي مرحمتي ویلي، چې وژل شوي کسان ایراني وګړي نه دي.
تر دې وړاندې د ایران دولتي خبري اژانس تسنیم خبر ورکړی و، چې نن سهار د سیستان - بلوچستان ولایت پر یوه سرحدي کلي له برید وروسته په تهران کې د پاکستان شارژدافیر د بهرنیو چارو وزارت ته ورغوښتل شوی، چې د پېښې په اړه وضاحت ورکړي.
