د شمالي کوریا دولتي خبري اژانس وايي؛ د روسیې ولسمشر ولادیمیر پوتین اراده کړې، چې ډېر ژر شمالي کوریا ته لاړ شي. د دې اژانس د نن ورځې د راپور له مخې؛ ښاغلي پوتین د شمالي کوریا له بهرنیو چارو وزیر سره په لیدنه کې دا اراده ښودلې ده.
د دې راپور له مخې؛ ښاغلی پوتین د شمالي کوریا له مشر مننه کړې، چې نوموړی یې خپل هېواد ته بللی دی.
دا به له دوو لسیزو وروسته اول ځل وي، چې د روسیې ولسمشر ولادیمیر پوتین شمالي کوریا ته ځي.
د کرملین ماڼۍ ویاند دیمیتري پیسکوف هم ویلي، چې ښاغلی پوتین شمالي کوریا ته ځي؛ خو زیاتوي چې لا کره وخت مالوم نه دی.
تسنیم خبري اژانس، چې د سپاه پاسداران اړوند دی، په يوه راپور کې په تهران کې د طالبانو تر واک لاندې د افغانستان په سفارت کې په ګڼه ګوڼه او ګډوډۍ نیوکه کړې ده. تسنيم د مراجعينو له قوله ليکلي، چې په سفارت کې ګڼه ګوڼه د افغان کډوالو «ډېر بد او ناخوښ» انځور وړاندې کوي.
په تهران کې د پاکستان په نوم سړک کې هره ورځ سلګونه افغانان د افغانستان سفارت ته ورځي.
د تسنیم خبري اژانس د راپور له مخې؛ ګڼه ګوڼه او د غوښتنو په پروسس کې ځنډ په دغه سفارت کې له عمده ستونزو څخه بلل کېږي.
تسنیم لیکلي: «د افغانستان له سقوط مخکې د دغه هېواد په سفارت کې دومره ګڼه ګوڼه نه وه؛ خو په دې ورځو کې د سفارت مرکزي او شاوخوا کوڅې د تهران په یو له بدو ښاري منظرو او د ګڼې ګوڼې په ځایونو بدلې شوې دي.»
دغې رسنۍ لیکلي: «په دغه سفارت کې بې نظمي او د پلان نشتوالی یوه جدي ستونزه بلل شوې او د دغه بهیر دوام ښايي په راتلونکي کې پراخې ستونزې رامنځته کړي.»
د تسنيم خبري اژانس خبريال د خپلو سترګو په لیدلي حال کې ليکلي، چې د سفارت په شاوخوا کې ګڼه ګوڼه او ککړ چاپيريال د سيمې خلک او هغه کډوال چې سفارت ته د اسنادو د ترلاسه کولو او يا د ستونزو د حل لپاره ځي له دغه حالت زوريږي.
له دې وړاندې هم په ايران کې مېشتو افغان کډوالو څو - څو ځله افغانستان انټرنشنل ته ويډيوګانې ليږلي او ويلي يې دي، چې دغه سفارت د مراجعينو د زيات شمېر له کبله د مناسب پلان او مديريت د نشتوالي له کبله ایراني اتباع له ستونزو سره مخ کړي دي.
د پاکستان د سند په مرکز کراچۍ کې د طالبانو کونسل وايي، له څه باندې یو کال په ډېره موده کې یې د دغې صوبې له زندانونو تر درې زرو دو سوو افغان بندیان خوشي کړي دي. عبدالجبار تخاری زیاتوي، پرون یې هم د ۱۱ ماشومانو په ګډون ۵۸ افغان بندیان خوشي او د چمن له لارې یې ا فغانستان ته ولېږل.
نوموړی د کونسلګرۍ اېکس کې لیکی، له تېر کال راهیسې په سند صوبه کې د ښځو او ماشومانو په ګډون دا خوشي شوي کسان د دوی په لګښت تر افغانستان لېږل شوي دي.
طالبان وايي، لا هم تر ۲۲۱ ډېر افغان بندیان په دغه صوبه کې شته او دوی یې د ازادولو هڅه کوي.
د طالبانو په واکمنېدو او له افغانستان د کډوالۍ د بلې څپې پیلېدو سره په پاکستان او ایران کې د افغان کډوالو ځورول هم زیات شول.
د پاکستان تر نورو ښارونو په کراچۍ کې پر بې اسناده کډوالو سربېره قانوني کډوال او ویزه لرونکي هم جېلونو ته واچول شول.
تېر کال د سند په مختلفو جېلونو کې څلور افغان بندیان مړه شول.
د ملګرو ملتو سرمنشي ویلي دي، چې د اسراییل او فلسطین د خلکو لپاره د دوو هېوادونو له حل سره مخالفت او د فلسطین د خلکو د یوه دولت له حق څخه انکار د منلو نه دی. انتونیو ګوتېرش وايي، هر څوک باید د فلسطین د خلکو دا حق په رسمیت وپېژني چې خپل هېواد جوړ کړي.
د امریکا ولسمشر جوبایډن پرون د اسراییل له لومړي وزير سره تر ټیلیفوني خبرو وروسته خبریالانو ته وویل، چې نتانیاهو د اسراییل او فلسطین د دوو دولتونو د جوړولو لپاره د ټولو حل لارو مخالف نه دی او ځینې ممکنې لارې هم شته.
خو د اسراییل لومړي وزیر د جوبایډن څرګندونې رد کړې.
بنیامین نتانیاهو ویلي له بایډن سره په خبرو کې يې ټينګار وکړ، چې اسراییل باید د حماس له ویجاړولو وروسته پر غزې خپل واک وساتي.
د اسراییل لومړي وزیر دفتر په يوه خبرپاڼه کې لیکلي، « له ولسمشر بایډن سره په خپلو خبرو کې نتانیاهو پر خپله تګلارې ټینګار وکړ، چې د حماس له منخه وړلو وروسته باید اسراییل پر غزې خپل امنیتي واک وساتي، څو ډاډ ترلاسه شي، چې غزه نور د اسراییل لپاره ګواښ نه ده. هغه څه چې د فلسطین د حاکمیت له غوښتنې سره په ټکر کې دي.»
د همدې اونۍ د پنجشنبې په ورځ د امریکا د بهرنیو چارو د وزارت ویاند ټینګار وکړ، چې د فلسطیني دولت له جوړیدو پرته د اسراییل د اوږدمهاله امنیتي ننګونواو د غزې د بیارغونې لنډ مهاله ننګونو ته د حل لاره نشته.
د پاکستان حکومت له لوري د سپین بولدک ـ چمن پر دروازه د پاسپورټ د جبري کېدو په غبرګون کې د پیل شوي پرلت سل ورځې بشپړېدونکې دي. دغو پرلت والو چې له نږدې سلو ورځو راهیسې د پاکستان د یادې پرېکړي په غبرګون کې پرلت پیل کړی، نن یک شنبه د (سلواغي ۱) نېټه یې د نه خوړو اعتصاب پیل کړ.
د چمن د لغړي اتحاد مشر او د پرلت سرلاری غوث الله اڅکزي د نه خوړلو د اعصاب د پیل پرمهال وویل: «موږ د ولس د ستونزو د حل په موخه هر ډول قربانۍ ته چمتو یو، که ووژل شو هم یې پروا نشته. موږ نن دلته د نه خوړو اعتصاب پیل کړ تر څو د پاکستان حکومت زموږ غوښتنې ومني.»
د چمن پرلتوال وايي، د نه خوړو اعتصاب به یې تر هغه وخت دوام وکړي تر څو چې د پاکستان حکومت د سپین بولدک ـ چمن پر دروازه د پاسپورټ د جبري کېدو پرېکړه نه وي اخیستې.
د چمن پرلت ویاند صادق خان اڅګزی وايي: «د پاکستان حکومت سره مو خبرې اترې هم روانې دي خو موږ به خپل اعتراضونو ته هم دوام ورکوو، موږ له خپلې پیل شوې مبارزې نه په شا کیږو او حکومت دې ته اړباسو چې خپله پرېکړه بدله کړي.»
نږدې سل ورځې پوره کیږي چې د سپین بولدک ـ چمن پر دروازه د پاسپورټ د جبري کېدو په غبرګون کې د چمن ځايي اوسیدونکو، سوداګرو او سیاسي ګوندونو پرلت وهلی دی.
د تورخم لاره چې له نهو ورځو راهیسې تړلې ده، پاکستاني رسنیو لیکلي چې له پولې دېخوا تر ۱۰۰ ډېرې لارۍ چې سبزئ او میوې لېږدوي بېرته پيښور ته راګرځېدلې دي. د پاکستان د ګمرک یوه چارواکي ډان ورځپاڼې ته ویلي چې پر ډیورنډ کرښه د تورخم دروازې پرانیستلو خبرې بې پایلې دي.
د دې راپور پر بنسټ، پاکستاني صادرونکو ویلي چې شاوخوا ۹۰ لارۍ د کینو، کچالو او نور د شبنې په ورځ له مالونو ډکې پېښور ته راستنې شوې دي. د دوی په خبره، د تېرې اوونۍ په اوږدو کې له پولې هاخوا ۳۰ لارۍ ورته مالونه لېږدول شوي دي.
پاکستاني چارواکو د شنبې په ورځ (د مرغومي په ۳۰مه) اعلان وکړ، چې پر ډیورنډ کرښه تورخم دروازه د افغان سوداګریزو لاریو چلوونکي باید ویزه ولري. ویل کیږي چې د دغو موټر چلوونکو اکثریت نه ویزې لري او نه هم پاسپورټونه او د اسلام اباد دغه پرېکړې وروسته دوی نه شي کولای له ډیورنډ کرښې تېر شي.
طالبانو هم د پاکستان پر دې پرېکړې اعتراض کړی او د دغه هېواد سوداګریزو لاریو ته یې اجازه نه ده ورکړې چې افغانستان ته ننوځي.
د دواړو خواوو متقابل عمل د دې لامل شوی چې د افغانستان او پاکستان ترمنځ په دغه کلیدي لاره باندې له یوې اوونۍ زیاتې مودې راهیسې سوداګریزې چارې ودرول شي.
د پاکستان ګمرک یوه چارواکي مجیب الله شینواري ډان ورځپاڼې ته ویلي، یو شمېر افغان موټر چلوونکي چې معتبرې ویزې لري په پاکستان کې د باروړونکو موټرو د درېدو له امله په ګڼه ګوڼه کې بند پاتې دي او بېرته نه شي راتلای.
د هغه په وينا، پاکستاني لارۍ هم د اړينو اسنادو له درلودلو سره سره د افغانستان لوري ته بند پاتې دي.
ښاغلي شینواري وویل، چې په تورخم کې د سوداګریزو فعالیتونو د ټکني کېدو له امله سوداګرو ته میلیاردونه پاکستانۍ کلدارې زیان رسېدلی دی.
هغه وویل چې د اسلام اباد او تهران تر منځ د وروستیو کړکیچونو او همدارنګه د افغان موټر چلوونکو لپاره د ویزې په شرطونو کې د بدلون په برخه کې د پاکستان له لوري د علاقي نه لرلو له امله د تورخم د بیا پرانستلو خبرې هم ټکنۍ شوې دي.
هغه خبرداری ورکړ چې پاکستاني توکي ښايي افغان مارکېټ له لاسه ورکړي، ځکه چې يو شمېر افغان سوداګرو له خپلو ايراني سيالانو د اړينو توکو د واردولو غوښتنه کړې ده.
په راپور کې د یوه ځايي سوداګر نظر ګل په حواله هم ویل شوي، چې د افغانستان د جلال اباد بازار کې یې ډیر ایراني توکي لیدلي دي.