د کندهار په پنجوايي ولسوالۍ کې يو ځوان د کورنيو ستونزو له کبله ځانوژنه یې کړې؛ خو ځايي طالبان یې لامل عصبي ستونزه يادوي. په کندهار کې دا د خپل ډول څلورمه پېښه ده، چې تر ډېره يې لامل د کار نشتوالی، کمزوی اقتصادي وضعیت او نورې کورنۍ ستونزې بلل شوې دي.
افغانستان انټرنشنل - پښتو ته رسېدلې معلومات ښیي، چې نن سې شنبه د کندهار پنجوايي ولسوالۍ د زنګاوات سېمي د ساميزو د جومات اړوند په یوه کور کې يوه ځوان د اقتصادي او کورنيو ستونزو له کبله ځان ځړولی دی.
د کندهار د طالبانو د امنيه قوماندانۍ ویاند اسدالله جمشيد پېښه مني او وايي، چې ځوان د عصبي ستونزو له کبله ځان وژلی دی.
د وژل شوي کس کورنۍ له مطبوعاتو سره د خبرو کولو څخه منع شوې.
په کندهار کې په تېرو څلورو مياشتو کې درې ځوانانو او يو د ډېر عمر لرونکې کس ځانونه ځړولي او وژلي دي، چې د درېيو کسانو د سېمو اوسېدونکو يې د ځان وژنې لامل اقتصادي ستونزي بللې وې؛ خو طالبانو د هغوی وژنه هم عصبي ستونزې يادې کړې وې.
طالبان ځان وژنه حرامه بولي او ټینګار کوي، چې ځانوژنه د هېڅ ستونزې حل لاره نه ده.
په افغانستان کې واک ته د طالبانو له رسېدو وروسته د ځوانانو لويه برخه بې دندو شوې او د کار پېدا کېدو لپاره ورځې - ورځې لالهانده ګرځي.
همدا راز تېره اونۍ دوه ځوانانو په بامیان ولایت کې ځان وژنه کړې وه، چې عامل یې بېکاري او فقر په ګوته شوی و.
د جلال اباد ښار یو شمېر څوکیدرانو چې د امنیتي ګواښونو له امله یې د نومونو له لیکلو ډډه کوو، نن سه شنبه (د سلواغې درېمه ) افغانستان انټرنشنل ـ پښتو ته وویل چې له یوې میاشتې راهیسې د طالبانو د ننګرهار امنیه قوماندان محمد فرید عمر او د امنیت امر طاهر مبارز د «امید اباسین» په نامه د څوګېدارانو د ګمارنې یو شرکت جوړ کړی دی.
دوی زیاتوي طاهر مبارز څواکیداران ګواښلي چې له دغه شرکت سره خپل ځانونه ثبت کړي او یا هم له خپلو دندو څخه لاس په سر شي.
د معلوماتو پر بنسټ په جلال اباد ښار کې لوړ پوړیزې ودانۍ او مارکېټونه شاوخوا ۶۰۰ څوکېداران لري.
د جلال اباد ښار ځايي څوکیداران وايي د طالبانو د کورنیو چارو وزارت څخه نیولې تر والي پورې یې خپل شکایتونه رسولي دي.
د جلال اباد د څوکيدارانو ټولنې افغانستان انټرنشنل ـ پښتو ته داسې اسناد په واک کې ورکړي چې د طالبانو کورنیو چارو وزارت امنیتي معینیت ترڅنګ د طالبانو د ننګرهار والي ملا محمد نعیم اخوند د ننګرهار امنیه قوماندانۍ ته په یوه مکتوب کې لیکلي چې د څوکېدارانو د ګمارنې، تغیر او تبدیل کې د مداخلې څخه ډډه وکړي چې دا شکایتونه پای ته ورسیږي.
د را رسېدلو اسنادو پر بنسټ د ننګرهار امنیه قوماندانۍ د ولایت والي له مکتوبه وروسته هم په جلال اباد ښار کې د ودانیو او مارکېټونو پر مالکانو خبرتیاوې وېشلې دي او دوه پوښتنې یې ترې کړي دي.
له دې ټولو شکایتونو سره بیا هم طالبانو پر ودانیو او د مارکیټونو له مالکانو د یوه استعلام له لارې پوښتنې کړې، چې د مالکانو لخوا منفي ځواب ورکړل شوو.
د جلال اباد څوکیداران وايي د طالبانو امنیه قوماندان او امنیت امر د دولتي قدرت او له بېلابېلو فشارونو سره غواړي چې د دوی لخوا جوړ شوی د څوکیدارانو شرکت کې په زوره د ودانیو او مارکېټونو مالکان او څوکیداران اړ کړي چې له دوی سره ځانونه ثبت کړي.
دوی غواړي د ودانیو او مارکېټونو مالکان د څوکېدارانو میاشتني معاشونه دغه شرکت ته وسپاري او بیا دغه شرکت په خپله خوښه یوه کمه اندازه معاشونه څواکيدارانو ته وټاکي او یا هم خپل کسان د پخوانیو څوکيدارانو پرځای وګماري.
یو ځايي څوکيدار افغانستان انټرنشنل - پښتو ته وویل: «اوس مونږه دوه وروڼه څوکيداران یوو، د میاشتې شاوخوا ۳۰ زره افغانۍ اخلو، خو طالبان وايي تاسو باید ۱۸ زره واخلئ چې دا د خپل ولس سره ظلم دی.»
په جلال اباد ښار کې د لوړ پوړیزو ودانیو او مارکېټونو مالکان اندېښنه لري که چیرې څوکېداران بدل شي نو دوی د طالبانو پر څوکېدارانو باور نه لري نو مجبور دي چې د خپل جایدادونو او دوکانونو امنیت په خپله وساتي.
له دې وړاندې د خوست ښار د پلازو او مارکېټونو یو شمېر ملکانو شکایت کړی وو، چې په دغه ولایت کې پر وسلو سمبال کسانو د کورنیو چارو وزیر سراج الدین حقاني په نامه زرواکي روانه کړې ده.
دوی ویلي وو، دغې ډلې د خوست ښار د پلازو او مارکېټونو مالکانو ته خبرداری ورکړی چې چوکیداران دې د دوی په خوښه وګوماري.
