د افغانستان د نولس کلنو کم عمره کرېکټ ملي لوبډلې نن د نړیوال جام په دریمه سیالۍ کې له نېپال ماتې وخوړه. افغان لوبډلې د لومړي پړاو په خپله دریمه او وروستۍ لوبه کې په ماتې خوړلو سره په دې جام کې د نورو لوبو چانس هم وبایله.
افغان لوبډلې د پچې ګټلو سره تر ۴۰ اورونو د خپلو ټولو لوبغاړو په زیان سره نېپال ته د ۱۴۶ منډو هدف وټاکه.
نېپال لوبډلې په ۴۵ اور کې د یوې ویکټې په لرلو دا هدف بوره او افغان لوبډله یې ماته کړه.
افغانستان په دې سیالو کې تردې وړاندې له پاکستان او نیوزیلنډ هم ماتې خوړلې وه.
د افغانستان د ملي لوبډلې لوبغاړی راشد خان د ملا له عملیات وروسته د احتیاط له مخې د پاکستان له سوپر لیګ څخه وتلی او په دغه لیګ کې به ونه لوبیږي.
راشد خان د پاکستان سوپر لیګ په تېرو درېیو فصلونو کې د لاهور قلندرز لوبډلې لپاره لوبیدلی و او په ۲۰۲۲ او ۲۰۲۳ کلونو کې یې سرلیګونه ګټلي وو.
هغه د ډسمبر په میاشت کې د لیګ له خوا د لوبیدونکو لوبغاړو په ډله کې شامل شوی و؛ خو دا باور هم موجود و، چې ښايي د ۲۰۲۴ کال په لوبلړیو کې لوبه ونه کړي.
نوموړی په تېر نومبر میاشت کې د ترسره شوي عملیات څخه وروسته د احتیاط لپاره په رسمي توګه له دغه ټورنمنټ څخه وتلی دی.
د پاکستان قلندرز لوبډله کولی شي، چې د راشد په ځای بل لوبغاړی خپلې ډلې ته اضاله کړي.
راشد د روانې عیسوي میاشتې په پیل کې د هند شل اوریزو لوبو لړۍ په جریان کې د خپلو افغان ټیم له ملګرو سره هند ته سفر کړی و؛ خو د عملیات وروسته د درملنې د پروسې له امله یې په لوبو کې ګډون ونه کړ.
هغه تر دې وړاندې د بیګ باش او سویلي اسیا په شل اوریزو سیالیو کې هم د نه ګډون فیصله کړې وه.
افغان ډلې مشر روزونکي جوناتن ټراټ ویلي: "مونږ غواړو ځان ډاډه کړو، چې د هغه د ملا سره له پوره احتیاطه کار اخلو."
ټراټ وايي: "هغه یو بانفوذه لوبغاړی دی؛ موږ باید ډاډ ترلاسه کړو چې هغه سل په سلو کې لوبو ته چمتو دی او روغتیا ته یې اندېښنه نه شته. کله چې هغه اماده شو، لومړۍ کس به وي چې د کرکټ میدان ته به راګرځي. یو څو نورې معاینې او ټسټونه یې باید وشي؛ تر څو چې اطمینان حاصل چې هر څه ښه پرمخ روان دي. زه هیله لرم چې هغه ژر لوبو ته راستون شي، مګر مونږ په دې کې بېړه نه کوو."
د ۲۰۲۴ کال له ۱۹ کلنو د کم عمره کرېکټ نړیوال جام په لړ کې د افغانستان له ۱۹ کلنو کم عمره ملي لوبډله د سې شنبې په ورځ (د سلواغې درېیمه) نېټه د نیوزلینډ له ۱۹ کلنو کم عمره لوبډلې په وړاندې د سیالۍ ډګر ښکته کیږي. دغه سیالۍ د افغانستان پر وخت د غرمې ۱۲ نیمې بجې پیلیږي.
د افغانستان له ۱۹ کلنو کم عمره ملي لوبډلې د نیوزلینډ له ۱۹ کلنو کم عمره لوبډلې تر منځ دغه سیالۍ د سوېلي افریقا په (بوفالو پارک) لوبغالې کې ترسره کیږي.
د ۲۰۲۴ کال له ۱۹ کلنو کم عمره کرېکټ نړیوال جام کې د افغانستان له ۱۹ کلنو کم عمره لوبډلې پیل ښه نه و او لومړۍ سیالۍ یې دوه ورځې وړاندې د پاکستان له ۱۹ کلنو کم عمره لوبډلې ته د ۱۸۱ منډو په توپیر وبایلله.
همدارنګه په همدې ورځ د سوېلي افریقا له ۱۹ کلنو کم عمره لوبډله د انګلستان له ۱۹ کلنو د کم عمره لوبډلې پر وړاندې د سیالۍ ډګر ته ښکته کیږي.
د سوېلي افریقا او انګلستان لوبډلو تر منځ سیالۍ د سوېلي افریقا په (سینسیس پارک) لوبغالي کې ترسره کیږي.
له ۱۹ کلنو د کم عمره کرېکټ نړیوال جام سیالۍ د روانې میاشتې په ۱۹مه نیټه د سوېلي افریقا په کوربتوب پیل شوې دي.
پاکستان د نیوزلینډ لوبډله په ۹۲ منډو د سیالۍ له ډګر بهر کړه او د شل اوریزې لوبلړۍ پنځمه لوبه یې په خپله ګټه پای ته ورسوله. پاکستان د دغې لوبلړۍ څلور مخکنۍ لوبې په پرله پسي ډول کوربه نیوزلینډ لوبډلې ته بایللې وې.
د نیوزلینډ په کوربه توب د پنځه شل اوریزو لوبو لوبلړۍ د ۲۰۲۴ کال د جنورۍ په ۱۲ پیل شوه او د دغې میاشتې په ۲۱ نیټه لوبلړۍ څلور پر یو د نیوزلینډ په ګټه پای ته ورسېده.
دغه لوبلړۍ د پاکستان د ملي ټیم د چټک توپ اچونکي شاهین افریدي په لوبډلمشرۍ ترسره شوه.
د نیوزلینډ په کوربه توب د شل اوریزو لوبو لوبلړۍ څلور پرله پسې لوبې کوربه نیوزلینډ لوبډلې وګټلې چې له امله یې په پاکستان کې د دغه هیواد پر لوبډله او د شاهین افریدي پر لوبډلمشرۍ سختې نیوکې هم وشوې.
خو د یادې لوبلړۍ وروستۍ لوبه د وړاندوینې خلاف پاکستان لوبډلې د ۴۲ منډو په توپیر وګټله.
له نیوزلینډ لوبډلې څخه د وروستۍ لوبې اتل د پاکستانۍ لوبډلې ۳۳ کلن افتخار احمد و،
نوموړي په تېرو اتو شل اوریزو لوبو کې توپ اچونه نه وه کړې، او له ۲۰۲۲ کال راهیسېیې یوه ویکیټه هم نه وه اخیستې او له یکشنبې وړاندې یې په ۵۳ لوبو کې یوازې څلور وېکیټې اخیستې وي.
خو نوموړي په نننۍ لوبه کې د نیوزلینډ لوبډلې درې لوبغاړي د ۱۱ منډو په ورکولو له میدانه بهر کړه.
پاکستان په دغه بریا سره له نیوزلینډ سره د لوبلړۍ د کلین واش مخنیوي وکړ او په پنځه لوبو کېیې یوه لوبه وګټله.
"راشد د کرېکټ خان" د هغه کتاب نوم دی چې لیکوال، څېړونکي او خبریال محمد جعفر هاند لیکلی. د کتاب ټوله محتوا د کرېکټ د وتلي ستوري راشد خان په مسلکي ژوند او لاسته راوړنو څرخي.
محمد جعفر هاند د شنبې په ورځ (د مرغومې ۳۰مه) په اېکس ټولنیزې رسنۍ کې د یو پیغام په خپرولو سره د خپل کتاب "راشد د کرېکټ خان" د چاپیدو او خپریدو اعلان وکړ.
ښاغلي هاند له افغانستان انټرنشنل ـ پښتو سره په خبرو کې وايي، چې کتاب د راشد خان په مسلکي ژوند راڅرخي. د کتاب ډېرې برخه د راشد خان د خولې خبرې دي.
ښاغلي هاند وايي: «راشد خان کله او څنګه کرېکټ شروع کړ؟ د افغانستان کرېکټ ته څنګه داخل شو؟ نړۍوال ستیج ته څنګه ورسېد؟ د هغه له ماشومتوبه نیولې تر دې دمه ټول موضوعات په دې کتاب کې راغلي دي.»
هاند زیاته کړه، چې دغه کتاب کې د راشد خان په اړه د هغه د روزونکو، د ملي لوبډلې د لوبغاړو، د راشد خپلې خبرې او د نړۍوالو مبصرینو د نظریاتو تر څنګ د ده خپل تحلیل او تجزیه هم شامله ده.
کتاب شاوخوا ۳۰۰ مخه دی او د دوه کلونو په لړ کې لیکل شوی دی.
ښاغلی هاند د "راشد د کرېکټ خان" له کتابه د یوې بیلګې په بیانولو سره داسې وايي: «مثلاً راشد خان د لسیزې غوره لوبغاړی شو. دا چې ولې او څنګه راشد د لسیزې غوره لوبغاړی شو د نړۍوالو مبصرینو نظرونه مې هم راخیستي، خپله تحلیل او تجزیه مې هم راخیستې بیا مې په دې اړه د راشد خان خبرې هم راخیستي.»
ولي راشد خان؟
ښاغلی هاند د دې پوښتنې په ځواب کې چې ولې راشد د کرکټ خان دی؟ وايي: «راشد د کرېکټ خان په دې خاطر دی چې راشد خان د افغانستان د کرېکت یو نایابه لوبغاړی دی، د لسیزې غوره لوبغاړی دی او د دنیا هر کرېکټ لیګ غواړي چې راشد ورته ولوبیږي. د ده له راتګ وروسته د افغانستان د کرېکټ بڼه بدله شوه. تر ټولو مهمه دا چې راشد په هېواد کې ډېرو ځوانانو ته له وطن سره د مینې انګیزه ورکړه.»
هاند زیاته کړه، چې راشد خان د افغانستان د کرېکټ په تاریخ کې مهمه څېره ده او موږ باید خپلې څېرې او تاریخونه هېر نه کړو، باید وې لیکو او د تاریخ په حافظه کې یې ژوندي وساتو.
هغه د دې کتاب د لیکلو د اړتیا په اړه وایي: « موږ باید خپل تاریخونه په خپله ولیکو، نسبت دې ته چې یو بهرنۍ راشي د خپل روایت په اساس زموږ تاریخ موږ ته بیان کړي. موږ باید خپل تاریخ د حقیقت له مخې او د خپل روایت له مخې ولیکو.»
ښاغلي جعفر هاند درې کاله مخکې "درې پېړۍ په نړۍ او افغانستان کې د کرېکټ تاریخ" په نوم یو کتاب هم لیکلی و. په دغه کتاب کې په افغانستان او نړۍ د کرېکټ د تاریخ او او اوسني وضعيت په اړه لیکل شوی و.
د افغانستان له ۱۹ کلنو کم عمره لوبډلې د کرېکټ نړۍوال جام کې خپله لومړۍ لوبه کې له پاکستان د ۱۸۱ منډو په توپير ماته وخوړه د ۱۹ کلنو کم عمره کرېکټ نړيوال جام سيالۍ په سويلي افريقا کې پرون پيل شوې او د راتلونکې میلادي میاشتې تر لسمې به روانې وي.
د پاکستان د ۱۹ کلنو کرېکټ لوبډلې د لوبې پچه وګټله او توپوهنه یې پیل کړه.
د پاکستان لوبډلې په ۵۰ اورنو کې د ۹ لوبغاړو په سوځېدو افغان ځوانانو ته ۲۸۴ منډې هدف وټاکه.
افغانستان دغه هدف پوره نه کړ او په ۲۶.۲ اور کې يې خپل ټول لوبغاړي د ۱۰۳ منډو په جوړېدو وسوځېدل.
افغانستان خپله دغه لومړۍ لوبه د ۱۸۱ منډو په توپير پر پاکستان وبايلل.
پاکستاني پيليز لوبغاړي شاهزيب خان په ۱۲۶ توپونو ۱۰۶ تر ټولو ډېري منډې جوړې کړې.
په افغان لوبډله کې خليل احمد تر نور ښه توپ اچونه وکړه او د پاکستان ۴ لوبغاړي یې وسوځول.
د ۱۹ کلنو نړۍوال جام په سياليو کې به افغانستان خپله دوهمه لوبه د راتلونکې سې شنبې په ورځ د نيوزيلنډ سره تر سره کړي.