د افغانستان کرېکټ بورډ احمد شاه سلیمانخېل د لوبغاړو د غوراوي کمېټې د سرپرست په توګه وټاکه
د ملي لوبډلې پخوانی لوبغاړی احمد شاه سلیمانخېل د افغانستان د کرېکټ بورډ د لوبغاړو د غوراوي کمېټې د سرپرست مسوول په توګه وټاکل شو.
د ملي لوبډلې پخوانی لوبغاړی احمد شاه سلیمانخېل د افغانستان د کرېکټ بورډ د لوبغاړو د غوراوي کمېټې د سرپرست مسوول په توګه وټاکل شو.
تر دې مخکې اسدالله خان چې د غوراوي کمېټې مشري یې کوله؛ د لوبډلو په ټاکلو کې د خلکو له خوا له سختو نیوکو سره مخ و.
د افغانستان کرېکټ بورډ د یکشنبې په ورځ (د سلواغي ۸مه)اعلان وکړ، چې احمدشاه سلیمانخېل یې د افغانستان د کرېکټ بورډ د لوبغاړو د غوراوي کمېټي د سرپرست مسوول په توګه په دنده ګومارلی دی.
د لوبغاړو د غوراوي کمېټي مخکنی مسوول چې اسدالله خان و، د نوموړي پر وړاندې غبرګونونه تر هغه وروسته زیات شول، چې په دې وروستیو کې د نولس کلنو په نړۍوال جام کې افغان لوبډله له پرله پسې ماتو سره مخ شوه.
ښاغلي اسدالله خان تېره ورځ په خپله فیسبوک پاڼه د خلکو له غبرګونو وروسته خپله چوپتیا ماته کړه او ویي ویل:«زه د نولس کلنو او په ملي لوبډله کې د شل اوریزو لوبډلو د ټاکلو حق نه لرم او نه ما څوک ټاکلي دي ».
د نوموړي له دغه وضاحت څخه وروسته د هغه له دندې څخه د لرې کېدو خبرې په ټولنیزو شبکو کې ګرمې شوې او نن یې د ځای ناستی خبر کرېکټ بورډ په خپله پاڼه خپور کړ.
