په کراچۍ کې د پاکستان د تحریک انصاف ګوند ځايي مشران وايي، چې پولیسو د دغه ګوند ۲۵ غړي نیولي او د ټاکنیزو کمپاینونو پر مهال ورته خنډونه جوړوي؛ خو پولیسو ویلي، چې دغو کسانو پر پولیسو د تیږو ګوزارونه کړي دي.
په کراچۍ کې د تحریک انصاف ګوند ځايي مشرې زهرا ندیم په یو ویډیويي پیغام کې ویلي، چې د پاکستان پولیس یې د کمپاین مخه نیسي او د نورو ګوندونو نوماندانو ته د کمپاین اجازه ورکوي.
نوموړې زیاته کړې ده، چې یو شمېر نوماندان په دولتي بودیجه خپل کمپاین کوي او له ټولو دولتي امکاناتو څخه استفاده کوي؛ خو پولیس د دوی د چارو مخنیوی کوي او ۲۵ غړی یې بندیان کړي دي.
د مېرمن ندیم په خبره، چې دوی نن دوشنبه له پولیسو څخه په کراچۍ کې د یوه سوله ییز لاریون لپاره مخکې له مخکې د پولیسو اجازه هم اخیستې وه؛ خو پولیسو د دوی ۲۵ ملګري د لاریون پر مهال نیولي دي.
د ځايي خبریال محمد عارف بلوچ په وینا، چې په لاریون کې د پولیسو او لاریونوالو تر منځ اخ و ډب رامنځته شوی او له هغې وروسته پولیسو دغه کسان نیولي دي.
په ورته وخت کې د کراچۍ پولیسو اعلان کړی، چې د تحریک انصاف ګوند په لاریون کې یې هغه کسان نیولي، چې پر پولیسو یې کاڼي ورول.
پولیسو ویلي، چې د لاریونوالو په ګوزارونو کې لس پولیس زخمیان شوي دي.
له دې وړاندې د پاکستان تحریک انصاف ګوند سرپرست مشر ویلي وو، چې په ټاکنو د دوی له ګوند سره د مور او مېرې سلوک کیږي.
د تحریک انصاف ګوند مشر او د پاکستان پخوانی لومړی وزیر عمران خان دا مهال په زندان کې دی او په ټاکنو کې له ګډون څخه منع شوی دی.
