یونیسېف: افغانستان په نړۍ کې یو له هغو هېوادونو دی، چې په چاودېدونکو توکو ککړ دی
د ملګرو ملتونو د ماشومانو د ملاتړ صندوق (یونیسېف) ویلي، چې په افغانستان کې د ناچاوده توکو څخه د ځان ساتنې په موخه به له درې مېلیونه ډېرو ماشومانو ته پوهاوی ورکړي.
د ملګرو ملتونو د ماشومانو د ملاتړ صندوق (یونیسېف) ویلي، چې په افغانستان کې د ناچاوده توکو څخه د ځان ساتنې په موخه به له درې مېلیونه ډېرو ماشومانو ته پوهاوی ورکړي.
د ملګرو ملتونو د ماشومانو د ملاتړ صندوق یا یونیسېف د سه شنبې په ورځ د (سلواغې ۱۰مه) پر اېکس پاڼه لیکلي چې، افغانستان په نړۍ کې په وسله د ککړو هېوادونو څخه یو دی.
د ماشومانو د ملاتړ دغې نړۍوالې ادارې ویلي، چې په ۲۰۲۴ کال کې به ۳.۶ مېلیونو ماشومانو او د ټولنې نورو وګړو ته د چاودېدونکو توکو د ګواښ په اړه پوهاوی ورکړي.
د ملګرو ملتونو د ماشومانو د ملاتړ صندوق ویلي، د دغو زدهکړو له لارې به د جګړې له پاتې چاودېدونکو توکو څخه د ماشومانو او ټولنې د وګړو د ټپي کېدو او مړینې مخه ونیول شي.
افغانستان د لسیزو راهیسې په جګړه کې ښکېل هېواد دی، چې پر خاوره یې زیات شمېر چاودېدونکي توکي ځای پر ځای شوي او اوس هم د سلګونه کسانو ژوند ګواښي.
اوچا او د سره صلیب نړۍوالې کمېټې تېر کال د افغانستان ختيځ او سويلي ولایتونه د چاودېدونکو توکو له امله تر ټولو اغېزمنې شوې بللې وې او لامل یې د جګړو پر مهال دغو خواوو کې تر ټولو سختې جګړې یادې کړې وې او دا یې هم ویلي و، چې په دغو سیمو کې له جګړو د پاتې شویو نا چاوده توکو کچه تر نورو هغو خورا زیاته ده.
