د طالبانو تر کنټرول لاندې د ملي المپیک ریاست په اېکس پاڼه لیکلي، چې د کندز د وزلوبې فدارسیون استازو د دغه ولایت د بدني روزنې ریاست په همکارۍ د ۸۵ لوبغاړو «چاپندازانو» ترمنځ د وزلوبې سیالۍ ترسره کړې.
دغو سیالیو دوه ورځې دوام وکړ، چې په پای کې پهلوان ذبیح الله او پهلوان شېرعلم په لومړي او دویم پړاو کې د جایزې ګټونکي شول.
کرېکټ بورډوايي، افغانستان په روان ۲۰۲۴ کال کې د ټېسټ اووه سیالۍ ترسره کوي. دغه هیواد په ټېسټ سیالیو کې د مقام له ترلاسه کولو وروسته اووه لوبې ترسره کړې خو سږکال به د نورو کلونو پرتله ډیرې سیالۍ وکړي.
د افغانستان کرېکټ بورډ ویلي چې، افغان لوبډله د چهار شنبې په ورځ د (سلواغې۱۱مه) له سریلانکا سره د یواځنۍ ټېسټ سیالۍ ترسره کولو په موخه کولمبو ښار ته ورسېده.
دغه سیالۍ د فبرورۍ په دویمه نېټه د سریلانکا پلازمېنې کولمبو ښار په سنهالیز کرېکټ لوبغالي کې ترسره کیږي.
د افغانستان کرېکټ بورډ تېره ورځ د دغې ټېسټ سیالۍ لپاره د حشمت الله شهیدي په لوبډلمشرۍ ۱۶ کسیزه لوبډله اعلان کړه.
بل خوا د افغانستان د کرېکټ بورډ ویاند سید نسیم شاه سادات وايي، افغانستان په روان ۲۰۲۴ کال کې اووه ټېسټ سیالۍ ترسره کوي.
نوموړی وايي، افغانستان په ټېسټ سیالیو کې د مقام ترلاسه کولو وروسته تردې مهاله اووه سیالۍ ترسره کړې دي.
د ښاغلي سادات په خبره کرېکټ بورډ د ۲۰ اوریزو او ۵۰ اوریزو سیالیو تر څنګ ټېسټ سیالیو ته ځانګړې پاملرنه کړې.
نسیم سادات وايي، د کال په اوږدو کې به افغان لوبډله له سریلانکا وروسته شپږ نورې ټېسټ سیالۍ د ایرلینډ، بنګله دیش، نیوزلینډ او زیمبابوې سره وکړي.
دا ټېسټ سیالۍ په داسې حال کې ترسره کیږي چې تر دې مهاله افغان لوبډلې په ټېسټ سیالیو کې د پام وړ کومه لاسته راوړنه نه ده لرلې.
د افغانستان کرېکټ بورډ د سرېلانکا پر وړاندې د يوې ټېسټ لوبې لپاره د ۱۶ کسيزې افغان لوبډلې نوملړ اعلان کړ. تر دې لوبې وروسته به افغان لوبډله د سرېلانکا سره درې نړۍوالي يو ورځنۍ او درې شل اوريزه لوبې هم ولري.
افغانستان کرېکټ بورډ نن دوشنبه د هغو ۱۶ افغان لوبغاړو نومونه اعلان کړل، چې د سريلانکا سره به په يوه ټيسټ لوبه کې ولوبيږي.
افغان کرېکټ بورډ وايي، چې لوبډله د دې ادارې غوراوي کمېټې ټاکلې او تمه لري، چې مثبته پايله به ورکړي.
د سرېلانکا سره مخ افغان لوبډله به د حشمت الله شهيدي په لوبډلمشرۍ لوبه تر سره کړي.
د کرېکټ بورډ غوراوي کمېټې دغه لوبډله غوره کړې ده: « لوبډلمشر حشمت الله شهيدي، اکرام علي خېل او اسحاق رحيمي ويکيټ ساتونکي، ابراهيم ځدران، رحمت شاه، عبدالمالک، نورعلي ځدراڼ، بهيرشاه محبوب، ناصرجمال، قیس احمد، ظاهرخان پکتين، ضياء الرحمن اکبر، يمين احمدزی، نجات مسعود، سليم ساپی او نويد ځدراڼ.»
د افغانستان او سرېلانکا دغه ټيسټ لوبه به د «فېبروري په ۲ مه» د راتلونکې جمعې په ورځ د سرېلانکا په پلازمېنه کولمبو کې تر سره شي.
افغانستان کرېکټ بورډ وايي، چې تر دې لوبې وروسته به د سرېلانکا سره د درېيو نړۍوالو یو ورځنيو او درې نړۍوالو شل اوریزو لوبو لپاره به هم افغان لوبډلې اعلان شي.
راشد خان د پاکستان کرېکټ په غوره لیګ کې د لاهور قلند لوبډلې له لوري اخیستل شوی و، خو نوموړی د دغه هیواد په سږني لیګ کې ځکه نه شي لوبېدلی چې د ملا له عملیات وروسته لوبو ته په بېرته راستنېدو کې د خپلې روغتیا د ساتلو لپاره احتیاط کوي.
راشد خان د پاکستان کرېکټ غوره لیګ (پي سي ایل) په تېرو دریو فصلونو کې یوازې د لاهور قلندر لوبډلې لپاره لوبېدلی او په ۲۰۲۲ او ۲۰۲۳ کې یاده لوبډله د پاکستان د کرېکټ غوره لیګ اتلولي هم ګټلې ده.
نوموړی د ۲۰۲۳ کال په ډیسمبر میاشت کې د لاهور قلندر لوبدلې له لوري په داسې حال کې له ځان سره د سپینو زرو په کټګورۍ کې وساتل شو چې هغوی پوهېدل، نوموړی به د ملا د عملیاتو له امله ورسره ګډون و نه لري. خو په راتلونکو فصلونو کې د دغې لوبډله سره د لوبېدو لپاره ساتل کیدای شي.
د کرېک اینفو د راپور له مخې راشد خان له هغه وروسته په رسمي توګه له یاد لیګ څخه وتلی چې په نومبر میاشت کې یې د ملا عملیات تر سره کړل او د خپلې روغتیا د ښه ساتلو لپاره احتیاط کوي. د دغې رسنۍ د معلوماتو له مخې لاهور قلندر لوبډله به د دوشنبې په ورځ د راشد خان پر ځای بل لوبغاړی په لوبډله کې له ځان سره خوندي کړي.
راشد خان د دې میاشتې په پیل کې له هندوستان سره د شل اوریزې لوبلړۍ په موخه یاد هیواد ته سفر وکړ خو د لوبو کولو لپاره وړ ونه ګڼل شو. له یادې لوبلړۍ څخه وړاندې له بیګ باش لیګ او د سوېلي افریقا لیګونو کې هم د نه لوبېدو پرېکړه کړې وه.
د افغانستان د ملي لوبډلې مشر روزونکي جانتن ټراټ ویلي: «زموږ لپاره مهمه ده چې باید ډاډ ترلاسه کړو او د راشد خان د روغتیا او لوبېدو لپاره ډیر احتیاط کوو.»
د طالبانو د بدني روزنې اداره وايي، د لوګر کې د ورزش ادارې له لوري د سوېل ختیځ زون د پنځو ولايتونو ترمنځ د واليبال سيالیو اتلولي پرون خوست لوبډلې په خپل نوم کړه. په دې څلور ورځنیو سياليو کې د غزني، پکتيا، خوست، پکتيکا او د کوربه ولایت لوګر واليبال لوبډلو برخه اخيستې وه.
د سیاليو وروستۍ لوبه کې د خوست کوربه لوبډلې لوګر «ب» ته د ۳ د ۲ ميدانو په توپير ماته ور کړه اود دې سياليو ګټونکې شو.
په دې سیالیو کې د لوګر ب لوبډلې دویم او الف لوبډلې دریم مقام وګاټه.
د لوګر د بدنې روزنۍ ادارې د مطبوعاتې څانګې په خبره، دا سيالۍ د واليبال درېیم پړاو اتلولۍ لیګ ته د غوره لوبغاړو ټاکل او پېژندل وو.
د افغانستان د نولس کلنو کم عمره کرېکټ ملي لوبډلې نن د نړیوال جام په دریمه سیالۍ کې له نېپال ماتې وخوړه. افغان لوبډلې د لومړي پړاو په خپله دریمه او وروستۍ لوبه کې په ماتې خوړلو سره په دې جام کې د نورو لوبو چانس هم وبایله.
افغان لوبډلې د پچې ګټلو سره تر ۴۰ اورونو د خپلو ټولو لوبغاړو په زیان سره نېپال ته د ۱۴۶ منډو هدف وټاکه.
نېپال لوبډلې په ۴۵ اور کې د یوې ویکټې په لرلو دا هدف بوره او افغان لوبډله یې ماته کړه.
افغانستان په دې سیالو کې تردې وړاندې له پاکستان او نیوزیلنډ هم ماتې خوړلې وه.