د افغانستان لپاره د ایران استازی وايي، که اړتیا پیدا شي، له غزې څخه د ملاتړ لپاره به له افغانستان څخه «له یوه زیات د استشهادي ځواکونو لښکر» واستوي.
حسن کاظمي قومي د افق دولتي شبکې ته ویلي چې افغانستان له غزې لرې پروت دی، خو د «مقاومت ځواکونو» یوه برخه ده.
ایران تر خپل ملاتړ لاندې ډلې او نورې هغه ډلې چې په سیمه کې د لوېديځې ټلوالې او اسراییل پر ضد جنګیږي د «مقاومت ځواکونه» نوموي.
ښاغلي قومي د «افق» دولتي شبکې ته د «د فلسطین افق ته» خپرونې د دې پوښتنې په ځواب کې چې ایا هغه د «افغانستان د خلکو» یا «د طالبانو تر واکمنۍ لاندې افغانستان» په اړه خبرې کوي، ښاغلي قومي وویل چې افغانستان له څلویښتو کلونو راهیسې د «اشغالګرو» پر وړاندې جنګیږي او «هیڅوک یې نه شي ویلی.» چې (دا جګړه) د یوه ملت او یوې ډلې ته ځانګړې ده.»
ایران د حماس او نورو فلسطیني ډلو له اصلي ملاتړو څخه دی چې د اسراییل پر وړاندې جنګیږي، خو د طالبانو حکومت یوازې د «اسراییلو د جنایتونو» په وړاندې د بیانونو په خپرولو او د غزې د خلکو په ملاتړ د کوچنیو لاریونونو په تر سره کولو پورې محدود پاتې شوی دی.