د افغانستان په اړه د منځنۍ اسیا هېوادونه او اروپایي ټولنې ځانګړي استازي د قرغیزستان پلازمېنه بشکېک کې غونډه کوي. په پام کې ده چې د بشکېک غونډه کې به په افغانستان کې د ملګرو ملتونو مرستندوی ماموریت او د ملګرو ملتونو له نشهيي توکو او جرمونو سره د مبارزې اداره هم ګډون وکړي.
د قرغیزستان له بهرنیو چارو وزارته په خپره شوې خبرپاڼه کې چې د ( سلواغې ۲۴مه) خپره شوې راغلي، چې په دې غونډه کې به په افغانستان کې د نشهيي توکو د قاچاق او ترهګریزو فعالیتونو پر ضد د ګاونډیو هېوادونو په مرسته او ملاتړ هم خبرې وشي.
د افغانستان لپاره د اروپایي ټولنې ځانګړي استازي توماس نېکولسن تېره اونۍ کابل ته د سفر پر مهال یوې خبري غونډې ته ویلي و، چې په دې غونډه کې به د افغانستان پر سیاسي، اقتصادي او بشري وضعیت خبرې وشي.
تر اوسه په دې غونډه کې د طالبانو د برخې اخیستنې په لړه څه نه دي ویل شوي؛ خو له دې مخکې طالبانو ویلي چې د افغانستان په تړاو جوړېدونکې غونډې د دوی له ګډون پرته سمې پایلې نه شي لرلای.
