د طالبانو د بهرنیو چارو د وزیر سلاکار ویلي، دا ډله د دوحې په ناسته کې د خپلو استازو د ګډون په اړه د ملګرو ملتونو له چارواکو او لویدیځو ګوندونو سره خبرې کوي. ذاکر جلالي وايي، طالبان د فرصتونو په لټه کې دي چې په نړۍوالو غونډو کې "مسوول استازیتوب" ولري.
طالبانو د دوحې د غونډې په څنډه کې د افغانستان لپاره د ملګرو ملتونو د نوي استازي له ټاکلو سره مخالفت وکړ او په دې غونډه کې یې د دې ډلې د استازو د "معنی وړ" حضور غوښتنه وکړه.
ذاکر جلالي د چهارشنبې په ورځ د (سلواغې ۲۵مه) په خپلې اېکس پاڼه لیکلي چې، طالبان له ملګرو ملتونو سره په غونډو کې د "معنی وړ" ګډون او د دوامداره تعامل ملاتړ کوي.
هغه ټینګار کړی، چې په دې ډول چلند سره به د ملګرو ملتونو او طالبانو ترمنځ خبرې په «لوړه او شفافه کچه» پیل شي.
د طالبانو د بهرنیو چارو وزارت سلاکار زیاته کړه، چې د دوحې ناسته یو فرصت دی په دې شرط چې په سمه توګه مدیریت شي.
په داسې حال کې چې په قطر کې د افغانستان په اړه د ملګرو ملتونو غونډه په نږدې کېدو ده، په افغانستان کې د دغه سازمان ځانګړي همغږي کوونکي فریدون سېنیرلي اوغلو د طالبانو د بهرنیو چارو له وزیر امیرخان متقي سره دوه ځلې کتلي دي.
ټاکل شوې، چې دا غونډه د ملګرو ملتونو د عمومي منشي په کوربهتوب جوړه شي، تمه ده چې په دې غونډه کې به د نړۍ د شلو هېوادونو استازي ګډون وکړي؛ خو تر اوسه د ښځو او د طالبانو د مخالفانو د حضور په اړه کره معلومات نشته.
د افغانستان له سویل څخه سیمهایزې سرچینې افغانستان انټرنشنل ـ پښتو ته وايي چې، په یو شمېر ولایتونو کې کروندهګرو په پراخه کچه د کوکنارو کرلو ته مخه کړې.
هلمند چې د افغانستان د نورو ولایتونو پرتله د تریاکو تولید په کې ډېر و، د طالبانو د مشر ملا هبت الله له لوري د کوکنارو د کر او قاچاق د منعې له فرمان وروسته د تېرو نږدې دوه کالو پر مهال په کې د نشهیي توکو بیې خورا لوړې او کرـ کېله یې کمه شوې وه.
د احمد خان په نوم یو قومي مشر افغانستان انټرنشنل ـ پښتو ته وايي، د تېرو دوو میاشتو راهیسې د هلمند په یو شمېر ولسوالیو کې کروندهګرو یوځلې بیا د نورو ولایتونو او سیمو پرتله ډېرو د کوکنارو کر ته مخه کړې.
نوموړی وايي:« د تاریاکو قیمتونه لوړ شول په مارکېټ کې تریاک کم شوي او خلک مجبوره دي چې کوکنار وکري خلک یې په پټه کري. بزګران بله لاره نه لري ځکه طالبانو امر کړی دی، چې تریاک بند دي نور نو د بزګرانو په کیسه کې نه دي چې هغوی څه شی وخوري.»
خو په دې ورستیو کې د طالبانو د کورنیو چارو وزارت د افغانستان په یو شمېر ولایتونو کې د کوکنارو د له منځه وړلو کمپاینونه پیل کړي دي.
د طالبانو د کورنیو چارو وزارت د روان میلادي کال د جنورۍ له ۱۵مې نیټې څخه د فبرورۍ تر ۱۴مې نیټې په هلمند، فراه، ارزګان، کندهار، ننګرهار، نیمروز، بلخ، لغمان، او بدخشان ولایتونو کې پر ۱۵۶۰ جریبه ځمکه د کوکنارو د کروندو د له منځه وړلو په اړه معلومات خپاره کړي دي.
په خپرو شویو معلوماتو کې لیدل کېږي، چې په ډېره انداره کوکنار په هلمند، کندهار او فراه ولایتونو کې له منځه وړل شوي.
او ویلي یې دي چې د ملا هبت الله اخوندزاده له فرمان څخه د سرغړونې په تور یې ۲۲۱ کسان چې پر خپلو ځمکو یې کوکنار کرلي وو نیولي او بندیان کړي یې دي.
طالبانو په داسې حال کې د افغانستان په یو شمېر ولایتونو کې د نشهيي توکو د کروندو د له منځه وړلو کمپاینونه پیل کړي، چې د دغې ډلې لوړ پوړي چارواکي تل د افغانستان لپاره د ملګرو ملتونو، اروپايي ټولنې او نورو بهرنیو چارواکو سره د لیدنو پر مهال په افغانستان کې د کوکنارو کرـ کېله صفر کچې ته د راټیټېدو ادعاوې کوي.
خو ایران په وار، وار ادعاوې کړې، چې اوس هم د نړۍ ۹۵ سلنه نشهيي توکي په افغانستان کې تولیدېږي.
