د طالبانو د کرنې، اوبولګولو او مالدارۍ وزارت د احصایې او معلوماتو ریاست د شمېرو له مخې، په افغانستان کې شاوخوا ۴۳زره مټریک ټنه د سټروسو مېوې (کینو، مالټه، نارنج او لیمو) راټولې شوې دي.
دغه وزارت په یوې خپرې شوې خبرپاڼه کې ویلي، سږ کال یو زر او ۵۴ هکټاره ځمکه د کینو او مالټو بڼونه پوښلې وه، چې له دغو بڼونو څخه ۱۲ زره او ۳۶۱ مټریک ټنه کینو او مالټې راټولې شوې دي.
د راپور له مخې، ډېری دغه مېوې د ننګرهار، لغمان او له کونړ ولایتونو څخه راټولې شوې دي.
دغه وزارت لیکلي، سږ کال په ټول هېواد کې ۱۳۱۶ هکټاره ځمکه د نارنج بڼونه پوښلې وه، چې له دغو بڼونو څخه په ټول هېواد کې ۲۲ زره او ۹۰۸ مټریک ټنه نارنج تولید شوي.
د دغه وزارت په وینا، په ننګرهار ولایت کې د نارنجو بڼونه ډېر دي او بیا په لغمان، کونړ او اروزګان ولایتونو کې هم د نارنجو حاصلات ډېر شوي وو.
خبرپاڼه زیاتوي، سږکال ننګرهار، لغمان، کونړ، اروزګان، تخار او کندوز ولایتونو د لیمو ښه حاصلات درلودل چې په ټولیزه توګه یې ۷۵۱ هکټاره ځمکه پوښلې ده، چې له دغو بڼونو څخه اووه زره او ۷۲۵ مټریک ټڼه لیمو تولید شوي.
د سټروس مېوې چې کینو، مالټې، نارنج او لیمو په کې شامل دي، تر ډېره په لغمان، کونړ او ننګرهار ولايتونو کې کرل کېږي.
د طالبانو د کرنې وزارت وایي، ننګرهار د هېواد يو له هغو ختيځو ولايتونو څخه دى چې هوا يې د سټروسو مېوو د کښت لپاره غوره ثابته شوې ده.
