په کابل کې یوشمېر هټۍوال وایي، د طالبانو لهخوا ورته څه موده مخکې ځمکې ورکړل شوې چې دوی پرې ځانته هټۍ او رسټوارنټونه جوړ کړل؛ خو اوس دوی ته د دغو ځمکو د بېرته اخیستو او د هټیو د نړولو سپارښتنه شوې ده.
له دغې ډلې ۱۵۰ تنه سره یوځای شوي او عریضه یې کړې.
دوی کې یو تن یې چې نه غواړي نوم یې واخیستل شي افغانستان انټرنشنل ته وایي، پر دغو ځمکو یې زرګونه ډالر لګولي او رسټورانتونه، د خوراکي او نورو اړینو توکو پلورنځي یې پرې جوړ کړي دي.
د هغه په وینا:« اوس مو عریضه کړې؛ خو دا راته څرګنده نه ده چې دغه عریضه به ځای ونیسي کنه؟»
هغه زیاتوي:« په دې کار سره نه یوازې د هټۍ او رسټورانتونو خاوندان زیان ویني؛ بلکې په دغه رسټورانتونو کې په کار بوخت کارکوونکي هم وزګارېږي او نن سبا د دندې لټون تر ټولو ننګوونکی کار دی.»
په دغه ډله کې هغه کسان هم شته، چې د کابل په بېلابېلو بازارونو کې غرفې لري.
دغه غرفه لرونکي کسان وایي، چې طالبانو په خپله دغه غرفې په دوی شاوخوا ۱۵۰۰۰ افغانۍ پلورلي او اوس غواړي چې دغه غرفې بېرته ټولې کړي.
یو غرفه لرونکی چې نه غواړي نوم یې واخیستل شي وایي:« په ۱۵۰۰۰ د یوې غرفې پېرل د غریب کاره کسانو لپاره خورا ستونزمنه خبره ده. اوسمهال په هغو سیمو کې چې دغه غرفې ټولې شوې خاوندان یې په کور ناست دي. حکومت باید داسې یو څه وکړي، چې د خلکو اقتصاد ښه شي؛ نه دا چې ورځ تر بلې د خلکو اقتصادي ستونزې نورې هم ډېرې کړي.»
د دوی په وینا، تر دې دمه ډېری دغه غرفې د شهزاده سرای مخامخ او پل باغ عمومي يه سیمه کې ټولې شوې دي.
له هغه مهاله چې طالبان په افغانستان کې واک ته رسول شوي ګڼو کابل مېشتو پخوانۍ رسمي دندې له لاسه ورکړي او د وړو دکانونو په جوړولو کوچنیو کاروبارونو ته یې مخه کړې، چې د خپلو کورنیو ورځینی لګښت پوره کړي؛ خو طالبان د مالیو او ټکسونو په پلمو هغوی ځوروي او داسې چلند ورسره کوي، چې هغوی له دغه کاره زړه توري کړي.
