دغه ځوان چې محمد شفایی نومېده، پرون ناوخته یې په خپل کور کې ځان زیندۍ کړی دی. نوموړی د افغانستان د غزني ولایت اوسېدونکی و، ۲۸ کاله عمر یې لاره او د دوو کالو راهیسې د پلازمېنې اسلام اباد په بهارکهو سیمه کې د خپلې کورنۍ سره یې ژوند کاوه.
د نوموړي دوستانو او د کورنۍ غړو یې افغانستان انټرنشنل پښتو ته وویل، چې دغه کډوال شاوخوا دوه کاله دغلته په دې تمه پاتې و چې ګوندې د کډوالۍ دوسیه به یې بشپړه شي او د هوسا ژوند تېرولو لپاره به لوېدیځو هېوادونو کې پناه واخلي؛ خو د دوه کالو په تېرېدو سره یې برخلیک جوت نه شو او څو ورځې وړاندې د یو برېښنالیک له لارې ورته خبر ورکړل شوی و، چې د نوموړی کېس نه دی منل شوی.
د سیمې اوسېدونکي وايي، له نوموړي دوه کوچني ماشومان او مېرمن پاتې شوي او په پام کې ده چې نن د هغه مړی افغانستان ته ولېږدول شي.
دا په پاکستان د ځان وژنې لومړنۍ پېښه نه ده او ښايي وروستۍ هم نه وي، تر ده وړاندې درې تنه نورو افغانانو هم د مهاجرتي دوسیو د ځنډېدو او اقتصادي ستونزو له کبله ځانونه وژلي وو او یوې افغانې پیغلې څو میاشتې وړاندې له پنځم پوړ څخه ځان غورځولی و.
