د هند د ملي امنیت شورا مرستیال وېکرام مېسري له طالبانو غوښتي، چې افغانستان کې دې لشکر طیبه او جیش محمد ډلو ته د فعالیت اجازه نه ورکوي. هغه په بېشکېک کې د سیمې د امنیتي چارواکو په ناسته کې وویل، طالبان دې دغو ډلو ته اجازه نه ورکوي چې هلته پوځي زدهکړې وکړي او یا پټنځایونه ولري.
هندي خبري رسنۍ «نیوز۱۸» راپور ورکړی، چې ښاغلي وېکرام په بېشکېک کې د سیمې د هېوادونو امنیتي چارواکو ناستې ته ویلي چې طالبان باید د لشکر طیبه او جیش محمد ترهګرو ډلو غړو ته اجازه ورنکړي چې په افغانستان کې روزنتونونه او پټن ځایونه ولري.
لشکر طیبه او جیش محمد دوه پاکستانۍ مذهبي ډلې دي، چې هند یې ترهګرې بولي.
هند پر یو شمېر بریدونو کې چې په ۲۰۰۱ کال کې د هغه هېواد په پارلمان شوی و او دا رنګه په ممبيي کې د تاج پر هوټل شوي برید کې هم د لشکر طیبه ډله ښکېله بولي.
دغه دواړه ډلې له هند څخه د کشمیر د بېلوالي لپاره هڅې کوي او د امریکا په ګډون ډېر هېوادونه دغه ډلې «ترهګرې» بولي.
د هند د ملي امنیت شورا مرستیال دغه غوښتنه د جمعې په ورځ د قرغزستان په پلازمېنه بېشکېک کې د سیمې د هېوادونو د امنیتي چارواکو په وړاندې وکړه.
ښاغلي مېسري ټینګار لاره، چې هېواد یې تل د افغانستان په پېښو کې رغنده ونډه لرلې او په راتلونکې کې به هم د یو مهم لوبغاړي په توګه پاتې شي.
هغه زیاته کړه، هند داسې ګڼي چې د افغانستان مسلې د حل لپاره په کار ده چې له «ټولنیز چلنده» کار واخیستل شي.
په دغې ناسته کې د ایران، روسیې، چین، هند، پاکستان، تاجکستان، قرغزستان، قزاقستان، ازبکستان او ترکمنستان امنیتي چارواکو برخه لرله.
