په افغانستان کې د ملګرو ملتونو د بشردوستانه مرستو همغږې کوونکې ادارې له افغانستان سره د سویس د ۱.۹ میلیون ډالرو د مرستو خبر ورکړ. اوچا ویلي دي، چې دغه پیسې یې د افغانستان بشردوستانه صندوق ته سپارلې دي.
دې ادارې نن په خپل اېکس د سویس له دې مرستو مننه کړې او زیاته یې ده، چې دغه هیواد تیر کال د مرغومې په میاشت کې هم له افغانستان سره د څلور میلیون ډالرو مرسته کړې وه.
دا په داسې حال کې ده، چې په افغانستان کې روان اقتصادي ناورین د بشردوستانه مرستو اړتیا زیاته کړې ده.
تر دې مخکې هم اوچا اعلان کړی و، چې افغانستان په نړۍ کې یو له خورا پیچلي بشري بیړني حالت سره مخ دی.
دغه دفتر وايي، په افغانستان کې څه باندې ۲۴ میلیونه وګړي بشري مرستو ته اړتیا لري.
له سوېلي ولایت کندهار څخه سیمه ییزې سرچینې افغانستان انټرنشنل ـ پښتو ته وايي، د کندهار لپاره د طالبانو والي ملا شیرین د دغه ولایت ټولو ادارو ته مکتوب لیږلی او امر یې کړی چې، په راتلونکې کې به په خپلو ټولو رسمي او نا رسمي ناستو کې د ساه لرونکو له تصویر اخیستلو او ویډیو کولو څخه ډډه وکړي.
د کندهار والي ملا شرین چې د سولې د مذاکراتي ډلې غړی او د طالبانو د مشر ملا هبت الله له نږدې کسانو څخه دی، د دغه ولایت ټولو ادارو په لیږل شوي مکتوب کې ویلي، چې د انځور او ویډیو اخیستلو زیان له ګټې څخه ډیر دی.
همدارنګه په دغه مکتوب کې ټولو ادارو امر ته شوی چې د خپلو فعالیتونو راپورونه په لیکلي او غږیزه بڼه خپاره کړي.
په کندهار کې د طالبانو له لوري پر انځور اخیستلو دغه تازه بندیز په داسې مهال لګول کیږي چې، په افغانستان د طالبانو له واکمن کېدو وروسته په تېرو دوه نیمو کلونو کې له شپږم ټولګي پورته ښوونځیو ته د نجونو پر تګ،له کوره بهر د ښځو پر کار کولو او نورو وروته مسایلو لا له وړاندې بندیزونه لګول شوي دي.
طالبانو په خپله لومړنۍ پنځه کلنه واکمنۍ کې پر انځور اخیستلو بندیز لګلولی و او دغه کار یې له اسلام سره په ټکر کې بللی و، دغې ډلې په دویم ځل واک ته تر رسیدو وړاندې په دوحه کې د مذاکراتو پر مهال ژمنه کړې وه چې دوی له پخوا بدل شوي او دا ځل به یې چارې او بندیزونه د پخوا په څېر نه وي.
د ملا شیرین له لوري د تازه خپاره شوي مکتوب له لارې په انځور اخیستلو بندیز د طالبانو د ډلې د پخواني دريځ څرګندويي کوي.
