په چين کې د طالبانو استازي د چنيايي دولتي شرکت د مشر سره په لېدنه کې د مس عینک کان د قرار داد پر عملي کولو او دوه اړخيزه همکاريو ټينګار کړی. دغه چینايي شرکت د عینک کان د استخراج تړون په ۲۰۰۷ کال کې د هغه مهال افغان حکومت سره، چې مشري یې حامد کرزي کوله لاسلیک کړ.
په چين کې د طالبانو سفارت نن دوشنبه په يوه خبرپاڼه کې ويلي، چې د دې ډلې استازي بلال کريمي د چينايي دولتي شرکت له مشر وانګ جيچنګ سره ليدلي.
په خبرپاڼه کې راغلي، چې په ليدنه کې دواړو لوريو د مس عینک کان د پروژې د پاتې تخنيکي کارونو د حل او ژر پيلېدو اړوند خبري کړي دي.
په چين کې د طالبانو دغه ډېپلوماټ هیله ښودلې، چې د مس عينک معدن د استخراج چارې دې په ښه ډول او ژر پيل شي.
خبرپاڼه د بلال کريمي له قوله ليکي: « د مس عینک معدن د استخراج د قرارداد په اړه مو هیله ده، چې یاد قرارداد به د دواړو اړخونو په همکاري له خپلو مندرجاتو سره سم په ښه ډول عملي شي.»
د چينايي دولتي شرکت (ايم سي سي) مشر په دې لېدنه کې د مس عينک معدن د استخراج د قرارداد اړوند د پرمختګونو څخه هم خوښي ښودلې ده.
نوموړي په واضح توګه ونه ويل، چې تر دې دمه په دې برخه کې کوم پرمختګ شوی دی.
د ۲۰۲۳ کال د جون په میاشت کې د چین د «اېمسيسي» شرکت مرستیال په کابل کې د مس عینک پروژې اړوند خپل پلانونه له طالب لوري سره شریک کړي وو.
د طالبانو د کانونو او پټرولیم سرپرست وزیر شهاب الدین دلاور په دې کتنه کې چینايي لوري ته ډاډ ورکړی، چې دوی د قرارداد له مخې د پروژې اړوند خپل مسولیتونه ترسره کړي او قراردادي شرکت دې هم نور د عملي کارونو پیل نه ځنډوي.
چین تل په دې سیمه کې تاریخي اثارو شتون ته ګوته نیولې او ویلي یي دي تر هغې، چې د عینک له ساحې لرغوني اثار په خوندي توګه ونه اېستل شي د پروژې د عملي کار پیلول سخت دي.
په پام کې وه، چې دغه شرکت پر مس عینک کان، چې د مسو یو ستر کان بلل کیږي څه باندې درې میلیارد ډالره پانګونه وکړي.
طالبان په بیا - بیا غوښتنه کړې، چې چینايي شرکت باید ژر د قرارداد له مخې عملي کارونه پیل کړي.
