د طالبانو د مخابراتو وزارت ویاند په افغانستان کې د انټرنېټي کاروونکو د معلوماتو د ساتلو لپاره د انټرنېټي تبادلې د مرکز د جوړولو اعلان وکړ. عنايت الله الکوزي زياته کړه؛ پخوا به هغه هېوادونه چې افغانستان انټرنېټ عرضه کولو، په اسانۍ سره د کاروونکو معلوماتو ته لاسرسى درلود.
د طالبانو د مخابراتو او معلوماتي ټېکنالوجۍ وزارت ویاند د خپلې اېکس ټولنیزې شبکې په پاڼه کې لیکلي دي، چې د دغه مرکز په جوړېدو سره په افغانستان کې د انټرنېټي کاروونکو امنیت تامین شوی دی.
عنايت الله الکوزي زياته کړه، چې د دغه مرکز په جوړېدو سره به د افغانستان د ټولو کاروونکو معلومات خوندي شي.
د طالبانو د مخابراتو وزارت د ویاند په خبرپاڼه کې راغلي، چې دغه مرکز د ۱۰ میلیونه افغانیو په لګښت جوړ شوی دی.
عنايت الله الکوزي ليکلي، چې د دغه مرکز په جوړېدو سره به په هېواد کې دننه هېوادوالو ته باکيفيته او ارزانه انټرنېټي خدمات وړاندې شي.
په همدې حال کې د افغانستان په بېلابېلو سیمو او په ځانګړي ډول کلیو کې یو شمېر افغانان لا هم چټک انټرنېټ او په ځینو سیمو کې مخابراتي خدمتونو ته لاسرسی نه لري.
تر دې مخکې د بامیانو د چیجین کلي یو شمېر اوسېدونکو افغانستان انټرنشنل ته ویلي وو، چې دوی د انټرنېټ په کارولو او ټیلیفونونو کې له ستونزو سره مخ دي.
