د دوحې په ناسته کې د افغانستان د ښځو استازې میترا مهران وایي، چې په دغه دوه ورځنۍ ناسته کې به د افغانستان لپاره ځانګړی استازی و نه ټاکل شي. نوموړې وايي؛ د وخت په تېرېدو سره به روښانه شي، چې د ځانګړي استازي په ټاکل کېدو کې به څه پرېکړه کیږي.
د اغلې مهران په خبره؛ د افغانستان لپاره د ځانګړي استازي ټاکل د سیمې او د نړۍ د هېوادونو ترمنځ یوه جنجالي سیاسي پروسه ده ترڅو وکولی شي په دې برخه کې یوې هوکړې ته ورسیږي.
میترا مهران زیاته کړه؛ هغه ځانګړی استازی چې د افغانستان لپاره ټاکل کیږي باید له معترضو ښځو، سیاستوالو او ان د طالبانو پر وړاندې د پوځي جبهو په ګډو له بېلابېلو اړخونو سره د کار کولو وړتیا ولري.
د دوحې په ناسته کې د افغان ښځو استازې وایي؛ له سره د تعامل په ېبرخه کې پرمختګ منتفي ده.
نوموړې له افغانستان انټرنشنل سره په مرکه، کې وویل، چېله طالبانو سره د تعامل لپاره هېڅ کوم پرمختګ نه دی شو او د طالبانو اوسني چلند ته په کتو سله دغې ډلې سره تعامل ستونزمن دی.
د نوموړې په وینا؛ له طالبانو سره په داسې حال کې د دوی نړۍوال همکاران تعامل نه کوي، چې دغه ډله بشري حقونو، د ښځو حقونو او د نړۍوالو معاهداتو ته چې افغانستان د یوه هېواد په توګه هغه ته ژمن دی په رسمیت نه پيژني.
له دې سره یو شمېر سرچینو افغانستان انټرنشنل ته ویلي، چې روسیه د طالبانو په غوښتنه د ښځو له استازو سره نه ګوري؛ خو د دوحې په غونډه کې د افغانستان د ښځو استازې میترا مهران وایي، چې هیله لري د مسکو استازی له دوی سره په غونډه کې حضور ولري او د نورو اړخونو غږ واوري.
د اغلې مهران په وینا: "دا موضوع په رسمي ډول د افغانستان د مدني ټولنې استازو ته نه ده ویل شوې خو هیله لرو چې روسیه به په دې غونډه کې برخه واخلي."
بل خوا د دوحې په غونډه کې د افغانستان د مدني ټولنې استازي لطف الله نجفي زاده له افغانستان انټرنشنل سره په خبرو کې وويل؛ نړۍ پرېکړه کړې چې له طالبانو پرته به پر مخ ځي او دا هغه څه دي چې طالبانو يې تمه نه درلوده.
د یادولو ده، چې د دوحې غونډه د طالبانو له شتون پرته د مدني ټولنې د پنځو استازو او له ۲۵ څخه د زیاتو نړۍوالو ځانګړيو استازو په حضور کې ترسره شوه.
