افغانستان انټرنشنل ته سرچينو ویلي، چې په کابل کې د طالبانو د پولیسو قوماندان عیسی حسیني مزاري نیولی او وروسته یې په ضمانت خوشې کړی دی. دغو سرچينو د امنيتي دلايلو له امله د نوم د نه ښودلو په شرط ويلي؛ طالبانو د هغه قضيه محکمې ته راجع کړې ده.
دغو سرچینو زیاته کړه، چې د طالبانو د پولیسو قوماندانۍ د سې شنبې په ورځ (د کب لومړۍ) د تبیان کلتوري بنسټ مشر حسیني مزاري د څو ساعتونو لپاره نيولی او بندي کړی یې و.
د سرچینې په وینا؛ نوموړی په ضمانت خوشې شوی دی.
سرچينې زياته کړې، چې طالبانو حسيني مزاري ته ويلي، چې د محکمې تر پرېکړې پورې دې هر ډول فرهنګي فعاليتونه بند کړي.
تېره میاشت په کابل کې د طالبانو پولیسو د عیسی حسیني مزاري د نیولو امر صادر کړ.
طالبانو وروسته له هغې د دغه روحاني کس د نیولو امر وکړ، چې خلکو د هغه د څرګندونو په اړه په کابل او په ځانګړې توګه د ښار په لویدیځ کې د سلګونو «فحاشیو» او «کلیساګانو» د شتون په اړه شکایت وکړ.
د ده پر ضد د کابل د لوېديځ د خلکو په شکايت کې راغلي دي:« عيسي حسيني مزاري (سيد نقيب الله) د رضوي (مشهد) ښار کې په پوره بې شرمۍ سره په يوه بيان کې د کابل لوېديځ خلګو او د کابل ټولو مومنانو ته د کفر او فحش د اړېکې الفاظ کارولي دي.»
عیسی حسیني مزاري چې ايران ته نږدې شخصیت دی، شاوخوا درې میاشتې وړاندې د ایران په مشهد ښار کې په یوه وینا کې وویل، چې د طالبانو نظام له جمهوري نظام څخه زر ځله غوره دی.
هغه ادعا کړې وه، چې د جمهوریت پر مهال په کابل کې د غربیانو له خوا تنظیم شوي «۹۶۰ فاحشه خانې» او «۵۰۰ کلیساګانې» فعالې وې.
