په کابل کې د روسیې سفارت په یوه خبرپاڼه کې د ملګرو ملتونو د سرمنشي انټونيو ګوټرېش له لوري په دوحې کې د افغانستان لپاره په جوړه شوې غونډه کې د طالبانو نه ګډون ستایلی او د دوی دغه کار یې د توجیه وړ بللی دی.
سفارت په دغه خبرپاڼه کې ويلي چې د قطر په دوحه کې د روانې فبرورۍ میاشتې په ۱۸ او ۱۹ نېټه د ملګرو ملتونو په دغې غونډه کې طالبانو ته د «یوې کوچنۍ برخې د ګډون بلنه ورکړل شوې وه نو ځکه طالبانو په کې له ګډون څخه انکار کړی دی.»
د ملګرو ملتونو سرمنشي تېره ورځ د خپلې وينا پر مهال وويل؛ د دوحې له غونډې مخکې یې د طالبانو یو لیک تر لاسه کړی، چې په کې د «نه منلو وړ» غوښتنې ترې شوې وې.
کابل کې د روسیې سفارت وايي، له هغه وروسته چې طالبانو په دغې غونډه کې له ګډون انکار وکړ نو د دوی استازي هم په دوحه کې د افغانستان له مدني فعالانو سره و نه کتل.
ښاغلي ګوټرېش د طالبانو د وضاحتي لیک په اړه ویلي چې دغې ډلې داسې غوښتنې کړې وې، چې د افغان ټولنې له نورو برخو سره د خبرو لپاره د ملګرو ملتونو له حق څخه سرغړونه وه.
تر دې مخکې طالبانو په یوه خبرپاڼه کې تایید کړې وه، چې له ملګرو ملتونو یې غوښتي، چې دوحې ته دې د افغانانو د یوازیني استازي په توګه بلنه ورکړي او نورو خلکو ته دې د افغانستان په استازیتوب له بلنې ډډه وکړي.
د دوحې غونډه د ملګرو ملتونو د سرمنشي په کوربه توب جوړه شوې وه، چې د افغانستان د مدني ټولنې په استازيتوب پنځو تنو ته بلنه ورکړل شوې وه.
د ملګرو ملتونو عمومي منشي د افغانستان د مدني ټولنې او نورو خلکو غږ اورېدل «مهم» وبلل.
