د خېبرپښتونخوا عوامي نشنل ګوند وايي، چې د فېبرورۍ په اتمه د پاکستان په عمومي ټاکنو کې په پراخ ډول درغلۍ شوې دي. د دغه ګوند مشر اېمل ولې خان ویلي، چې د پاکستان پوځ په ټاکنو کې لاسوهنه کړې ده.
د پاکستان عوامي نشنل ګوند د سې شنبې په ورځ (د کب لومړۍ) پر خپل اېکس پاڼې لیکلي، چې د خیبر پښتونخوا ایالت په صوابۍ سیمه کې یې لاریون کړی، چې پکې د یاد ګوند سلګونو پلویانو هم ګډون کړی وو.
د دغه ګوند مشر اېمل ولي خان د فېبرورۍ میاشتې پر ۱۴مه نېټه ویلي وو، چې په پاکستان کې د ټاکنو پر مهال د تر سره شویو درغلیو په ضد د خیبرپښتونخوا په لویو ښارونو کې لاریونونه کوي، چې نن یې د یاد ایالت له صوابۍ سیمې څخه پیل کړ.
د دغه ګوند مشر اېمل ولې خان د لاکریون پر مهال په خپله وینا کې د پاکستان پر پوځ تور پورې کړ، چې په ټاکنو کې یې لاسوهنه کړې.
نوموړی وايي: "باچا خان په ۱۹۳۰ کال کې د همدې جمهوریت او د خلکو د رایو په خاطر شپږ کاله بندي شوی و، اوس هم دا دی د پوځ له لوري په ټاکنو کې لاسوهنه شوې ده او یو ځل بیا جمهوریت تر سوال لاندې راغلی او د خلګو رایو ته درناوی ونه شو))
د فېبرورۍ په اتمه په پاکستان کې په عمومي ټاکنو کې د پوځ له لورې د لاسوهنې له امله د دغه هېواد پر پوځ ډیرې نیوکې وشوې، خو تردې مهاله د پاکستان پوځ ددغو نیوکو په اړه څه نه دي ویلي.
له دې سره اېمل ولي خان وايي په پاکستان کې د محکمو واک هم له پوځ سره دی او نوموړی به خپله عریضه ولس ته وړاندې کړي.
د یادونې وړ ده، چې عوامي نشنل ګوند د فېبرورۍ اتمې په ټاکنو کې په خیبرپښتونخوا ایالت کې یوه او په بلوچستان ایالت کې دوه څوکۍ ګټلي دي.
