د روسیې د بهرنیو چارو وزارت ویاندې ویلي، د طالبانو او د سیمې د هېوادونو له ملاتړ پرته د افغانستان په اړه هر ډول اقدام له ناکامۍ سره مخ دی. ماریا زاخارووا په دوحه کې د افغانستان په اړه د ملګرو ملتونو دوه ورځنۍ ناسته ماته خوړلې بللې ده، چې طالبانو پکې ګډون نه و کړی.
نوموړې پرون په اړه ویلي: « د طالبانو پلاوي ځکه د دوحې په ناسته کې له ګډون ډډه وکړه چې عادي مسایلو لکه د افغانستان د مدني ټولنې د تښتېدلو استازو ته په دې غونډه کې د ګډون اجازه ورکړل شوه .»
د روسیې د بهرنیو چارو د وزارت ویاندې زیاته کړه، چې د ملګرو ملتونو د مخکیني پلان په اړه چې د افغانستان لپاره د ځانګړي استازي پوست او د "کوچنۍ تماس ډلې" د جوړولو په هکله کومه پریکړه نه ده شوې.
هغې ټینګار وکړ، چې دا ډول مسله له مناسب توضیح پرته په اجنډا کې ځای په ځای شوې.
ماریا زاخارووا زیاته کړه، د سیمه ییزو خواوو یوځای کېدل یوازې په دې شرط ممکن دی چې امریکا او ناټو د افغانستان د اوسني وضعیت او له جګړې وروسته د دغه هېواد د بیارغونې اصلي مسوولیت په غاړه واخلي او بندې شتمنۍ کابل ته وسپاري.
د روسيې د بهرنيو چارو وزارت وياندې وويل، چې د دغه هېواد پلاوي د دوحې د غونډې په څنډه کې د چين، ايران او پاکستان له استازو سره په پر له پسې توګه خبرې کړې او په دغو کتنو کې يې د سيمه ييزو همکاريو د پياوړتيا لپاره یې د روسيې پر پيوستون ټينګار کړی دی.
مېرمن زاخارووا زیاته کړې، چې روسیې د پیوستون د ښودلو په موخه په دې غونډه کې له افغان استازو سره له اړیکې نیولو ډډه کړې.
د افغانستان په اړه د ملګرو ملتونو دویمه غونډه د یکشنبې او دوشنبې په ورځو په قطر کې د ملګرو ملتونو د سرمنشي انتونیو ګوترېش په کوربتوب جوړه شوه.
د روسیې او ایران ځانګړو استازو د طالبانو د بهرنیو چارو وزارت په غوښتنه د دوحې په غونډه کې د افغانستان د مدني ټولنې له څلورو استازو سره له لیدنې ډډه کړې ده.
