په افغانستان کې د ایران پخوانی سفیر وايي، د هلمند د اوبو د کمیسارانو په وروستۍ غونډه کې د طالبانو د تعامل څرنګوالي وښوده، چې دغه ډله د ژمنو او رسمي هوکړو د عملي کولو اراده نه لري. رضا بهرامي په اېکس کې لیکلي، چې طالبان په مسوولیت منلو «نه پوهېږي.
د ایراني او طالب چارواکو ترمنځ د هلمند د اوبو د کمیسیون ۲۷مه غونډه په دې وروستیو کې د سیستان او بلوچستان په زابل ښار کې جوړه شوه، خو بې پایلې پای ته ورسېده.
ایراني رسنیو راپور ورکړی، چې ایراني پلاوي په دې غونډه کې په وروستیو کلونو کې له هلمند سیند څخه د ایران د حقابې د نه رسیدلو په اړه راپور وړاندې کړی دی.
دغه پلاوي د ایران د حقابې د خنډونو او د هلمند د سیند او د کمال خان بند په اوږدو کې د افغانستان د رغنیزو فني ستونزو په هواري هم ټینګار کړی دی.
طالب چارواکو ددې ناستې په اړه څه نه دي ویلي.
د ایراني رسنیو د راپور له مخې، د طالبانو پلاوي په دې غونډه کې د افغانستان د وچکالۍ راپور وړاندې کړی دی، خو ایراني پلاوي د ماهواره یي مستندونو په وړاندې کولو سره د طالبانو دغه ادعا رد کړې ده.
