د پاکستان بندي پخوانی لومړی وزیر له پیسو نړیوال صندوق غواړي، چې له اسلام اباد سره د پور په هکله تر راتلونکو خبرو مخکې وروستیو ټاکنو کې د درغلیو اړوند د خپلواکو پلټنو غوښتنه وکړي.
د عمران خان وکیل نن په اسلام اباد کې وویل، چې خان په یوه لیک کې له پیسو نړیوال صندوق دا غوښتنه کوي.
پاکستان تېر دوبی د پیسو نړیوال صندوق په لنډمهالي پور سره د اقتصادي حالت د بدترېدو مخه ونیوله، خو دا پروګرام راتلونکې میاشت ختمېږي او نوی حکومت به د ۳۵۰ میلیارد ډالري اقتصاد د ټیکاو لپاره پر اوږدومهالې هوکړه ور سره خبرې کوي.
عمران خان او ګوند یې وايي وروستیو ټاکنو کې چې یو ګوند هم اکثریت ونه ګاټه درغلي شوې ده.
د عمران خان ملاتړو نوماندانو تر نورو ګوندونو ډېرې څوکۍ ګټلې دي، خو مسلم لیګ نواز او پیپلز ګوند پر ګډ حکومت هوکړه کړې ده.
د عمران خان وکیل علي ظفر نن د ښاغلي خان له جېل بهر خبریالانو ته وویل: «د عمران خان په لیک کې به موږ دا ډاګیز کړو چې که د پیسو نړیوال صندوق له پاکستان سره خبرې کوي، نو دوی باید د ټاکنو په هکله بې پرې پلټنې هم وکړي.»
علي ظفر وايي، د پیسو نړیوال صندوق او د اروپايي ټولنې په څېر نړیوال بلاکونه یوازې په دې شرط له یو هېواد سره مالي مرسته کوي چې هلته د بې پرې او ازادو ټاکنو په ګډون ښه حکومتولي او ولسواکي وي.
د پاکستان ټاکنو کمېسون په ټاکنو کې د پراخې درغلۍ تورونه ردوي او په دی اړه دوی ته رسېدلي شکایتونه هم ارزوي.
د پاکستان ټاکنې د روانې میلادي میاشتې پر اتمه وشوې چې په نتیجه کې یې د پاکستان تحریک انصاف ګوند ملګرو ۹۲ پارلماني څوکۍ یې ګټلې دي.
په دې ټاکنو کې مسلم لیګ نواز ډلې د ۷۹ څوکیو په ګټلو له پیپلز ګوند سره، چې ۵۴ پارلماني څوکۍ یې ګټلې دي، د ګډ حکومت پر جوړولو کړې ده.