یوناما په غزني ولایت کې د طالبانو له خوا د دوو کسانو د اعدام په غبرګون وویل، چې ملګري ملتونه د اعدام د مجازاتو مخالف دي.
یوناما د پنجشنبې په ورځ (د کب ۴مه) په خپل اېکس کې لیکلي، چې طالبان دې ژر تر ژره د اعدام مجازات لغوه کړي.
دغې ادارې همداراز لیکلي، چې په عام محضر کې د خلکو اعدام د ژوند له اساسي حق سره په ټکر کې دی.
اخوا د غزني ښار یو شمېر طالب پلوه اوسېدونکو په ټولنیزو رسنیو کې د طالبانو له لوري د یادو دوو کسانو پر اعدام خوښي ښودلې او ویلي یې دي، چې د قصاص حکم عملي کېدل به د جرایمو کچه کمه کړي.
د یادولو ده، چې د طالبانو سترې محکمې نن د یوې خبرپاڼې په خپرولو سره وویل، چې د غزني ولایت د مرکز د علي لالا کلي د فوټبال په لوبغالي کې د سلګونو کسانو په حضور کې پر دوو کسانو د قصاص حکم عملي شو.
اعدام شوي کسان د میدان وردګو او د غزني ولایت د اندړو ولسوالۍ اوسېدونکي و.
طالبان په داسې حال کې په افغانستان کې د قصاص او درو حدود عملي کوي، چې پر دغه ډله د بې ګناه وژنو ډېرې ادعاوې شته.
که څه هم په عام محضر کې قصاص او په درو وهل له بشري حقونو سرغړونه بلل کېږي؛ خو طالبان وایي چې شرعي حکم عملي کوي.